فن و مشاهير

آية قرآنية سبب اعتزالها..أسرار قد تعرفها للمرة الأولى عن الفنانة نورا

وشها  ملئ ببراءة وملامحها هادئة لدرجة إنك عندما تشاهدها على الشاشة تفرح إنك ستشاهد على فيلم لها.. التي سنتحدث عنها في التقرير التالي هي الفنانة نورا .

الفنانة نورا اللي وصلت 69 سنة يوم 18 يونيو 2023 اللي بيوافق عيد ميلادها.. ونورا حياتها مليانة أسرار اتجوزت مرتين منهم جوازة من فنان شهير جداً ليها معاه قصة غريبة وقت انفصالهم.. بس الفنان كشف الحقيقة كلها.. ده غير إنها اعتزلت في عز نجوميتها والسبب آية قرآنية ده غير خلافها مع جوز أختها الفنان الراحل نور الشريف وحكايات تانية كتير هقولكم عليها.

الفنانة نورا اتولدت يوم 18 يونيو سنة 1954.. اسمها الحقيقي علوية مصطفى محمد قدري وشهرتها بدأت تتشهر في التمانينات لحد ما قررت تعتزل في وقت هي فيه نجمة والأضواء متسلطة عليها.. اشتغلت في التمثيل من وهي طفلة وده كان في فيلم وفاء للأبد سنة 1962.

والشهرة جت مع فيلم بيت من الرمال سنة 1972، وفيلم عنتر شايل سيفه مع عادل إمام عملها نقلة كبيرة ده غير فيلم “العار” مع الفنان الراحل نور الشريف.. ومرت الأيام واستمر شغلها لحد ما خدت قرارها السريع والمفاجئ وبشكل نهائي مفيش رجعة فيه.

سر الاعتزال

نورا قررت اعتزال الفن زي ما قلنا وهي في عز نجوميتها واللي حصل كانت شاهدة عليه الفنانة ​عفاف شعيب​ أصلها كانت معاها في القعدة.

وقالت في حوار تلفزيوني ليها إن هما الاتنين كانوا في بيت نورا.. وفجأة سمعت آية قرآنية بتقول: “وإذ قالت الملائكة يا مريم إن الله اصطفاك وطهرك واصطفاك على نساء العالمين.. يا مريم اقنتي لربك واسجدي واركعي مع الراكعين”.. وبتقول عفاف إن نورا قعدت تعيط وقررت الاعتزال في اللحظة دي ومن وقتها بقالها 26 سنة متراجعتش عن القرار.

ظهور نورا بيكون من فترة للتانية وفي مناسبات خاصة وهي بالمناسبة ملهاش حسابات على السوشال ميديا وكانت الصور اللي بتتنشر من خلال مي نور الشريف بنت أختها يعني في عيد ميلادها لما بيحتفلوا بيها بينشروا صور لما يكون في مناسبة مع نورا أو مع أي حد من الأسرة أو المقربين.

زيجة وانفصال غريب

فيلم عنتر شايل سيفه اللي ظهرت فيه نورا كان سبب جوازها من الفنان حاتم ذو الفقار أصل الفيلم ده هو سبب قصة حبهم.. المهم وقتها حاتم ذو الفقار كان مفروض يتجوز واحدة قريبته ما هو أبوه اللي كان عاوز كده بس حاتم قال لأ وألف لأ واعترض على أبوه وفاز بحب حياته نورا.

اتجوزوا وحضر فرحهم فنانين كتير جداً زي ليلى علوي ويسرا ومحمود ياسين ومحمود عبدالعزيز وفاروق الفيشاوي ونور الشريف وعادل إمام ويحيى الفخراني ومريم فخر الدين وفريد شوقي ومديحة يسري وغيرهم.. بس بعد فترة قصيرة من الجواز الاتنين أعلنوا الانفصال راحوا على المأذون وانفصلوا في هدوء بس اللي اتقال وقتها إن عشان يتم من غير شوشرة حاتم طلب 30 ألف جنيه من نورا عشان تاخد حريتها.. وفعلاً حصل الانفصال اللي صدم ناس كتير.

سر الانفصال

كلام حاتم ذو الفقار عن نورا كان جميل جداً وقال بعد انفصاله إنه معندوش خجل يقول إن حب حياته كانت الفنانة نورا.. وقال كمان إحنا كنا ولاد بلد وانفصلنا في هدوء ومن غير مشاكل عشان نعرف الأصول.. وده عكس كل الكلام اللي كان بيتقال بخصوص الانفصال وإن إدمانه الممنوعات كانت السبب في طلب نورا الانفصال.

لكن الصح اللي اتقال وقتها إنها اكتشفت شخص تاني غير حاتم اللي كانت تعرفه وقت الخطوبة وقصة حبهم ولما بقوا تحت سقف واحد كان باين إن في تباعد بينهم واختلاق في وجهات النظر ومحصلش تفاهم.

وحاتم ظهر في لقاء تلفزيوني مجابش سيرة الـ30 ألف جنيه اللي اتقال إنه كان عاوزهم مقابل الانفصال بس قال كلام خطير جداً.

كانت الحياة عادي بينهم قضوا شهر العسل في اليونان وبعدها جاله شغل في دبي بعتلها تحصله وبدل الأوضة خد سويت كامل عشان يستقبلها فيها قضوا وقتهم عادي ورجعوا على الشقة بس كانوا بيتكلموا في أمورهم الخاصة كانت نورا بتعلقه زي الخلفة مثلا بيقول إنها كانت مترددة وبعدين رفضت والموضوع ملوش علاقة بجسمها أحسن يتخن والكلام ده لأ ده في زن على الودان وده أمرّ من السحر زي ما بيقولوا أختها بوسي وصحباتها كانوا علطول بيتكلموا معاها وبتسمع كلامهم.

نورا كانت بتحب السهر يقولها نروح لماما وأنا وعدتها أتغدى معاها تقول لأ يلا نروح نسهر وصحابنا مستنيين.. الغريبة بقى إن نورا وقت الطلاق عطلته ويوم في التاني تقوله قررت طيب يلا بينا تقوله يومين كمان لحد ما جه في يوم وقالها يلا نروح للمأذون وكان لازم نخلص.

خلافها مع نور الشريف

بخصوص السرْ اللي ورا خلاف نورا ونور الشريف واللي كان مستمر بينهم قالت الفنانة نورا في حوار سابق ليها إن الفنان نور الشريف كان دايما يختلف معاها بسبب إنها رافضة تقرأ وتتثقف..
وده مكانش عيب فيها أد ما كان لأن نور كان فنان بيقدر القراءة وعارف أهميتها لكن نورا كانت بتميل لمشاهدة الأفلام السينمائية لأ وكمان وصفت نفسها بالكسولة.. يعني نور الشريف كان عنده حق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى