كيف يؤثر سعر السولار الجديد على الأسواق؟

هل تتأثر الأسعار لمختلف السلع بعد قرار الحكومة بزيادة أسعار السولار جنيه واحد؟، هل هذا الجنيه فعلا ممكن يأثر على الأٍسعار أم أن هذا مجرد كلام ، وإن كان هناك زيادة فأي سلع ستتأثر؟

والأهم من ده كله هل الخضار والدواجن هتتأثر بالزيادة دي؟ ، خليكوا معانا في الفيديو ده وانتوا تعرفوا إيه اللي هيحصل الفترة الجاية:

السولار بيستخدم في أغلب وسائل نقل البضايع والشحن وفي بعض الموصلات العاملة وكمان في مطاعم بتستخدمه وفي مخابز كمان بتعمل كده.

وعشان كده المصريين قلقانين شوية بعد قرار الحكومة برفع سعره وبيسألوا ياترى ممكن الأسعار تزيد فعلا وإيه أكتر سلع هتتأثر بالزيادة دي؟

خبراء مصرفيون في تصريحات ليهم لموقع مصراوي قالوا إن قرار الحكومة بزيادة سعر السولار هيأثر على ارتفاع وتيرة معدل التضخم وده معناه إننا هنشوف الفترة الجاية زيادات في أسعار السلع والخدمات.

واللي حصل إن لجنة التسعير التلقائي للمنتجات البترولية قررت تزود سعر السولار جنيه واحد س عشان يوصل لـ 8.25 جنيه ولو انت مش عارف فـ الحكومة كانت مثبتة سعر السولار لـ فترة طويل واخر مرة زودت سعر السولار كان من 9 شهور

وفي تصريحات لـ موقع مصراوي سهر الدماطي الخبيرة المصرفية كانت شايفه انه هيكون في ارتفاع فمعدلات التضخم وده هيأثر على الأسعار بشكل بسيط.

لكن عبرت عن قلقها من جشع السائقين وده لأنهم ممكن يستغلوا الزيادة دي ويرفعوا الأسعار من نفسهم وبشكل مبالغ فيه وعشان كده كانت شايفه إنه لازم الحكومة يكون ليها دور رقابي عليهم.

والسؤال بقى ياترى بعد زيادة السولار.. أسعار الدواجن ممكن تزيد في الأسواق؟

عبد العزيز السيد رئيس شعبة الدواجن بغرفة القاهرة التجارية قال في تصريحات لمصراوي إن أٍسعار الدواجن هتزيد بشكل طفيف بعد زيادة أسعار السولار والزيادة دي مش هتعدي الـ 10 قروش في كل كيلو.

وده لأنه كان شايف إن نقل الدواجن من المزارع لـ المحلات بيتم عن طريق عربيات نقل تستخدم السولار، وبكده أٍسعار النقلة الواحدة هتزيد حوالي 500 جنيه وحمولة النقلة الواحدة بتكون لحوالي 5 آلاف طن

وبكده نصيب الكيلو من الزيادة هيكون 10 قروش بس، لكن رئيس شعبة الدواجن كان شايف إن الـ 10 قروش دي ممكن تزيد في فصل الشتا وده لأن التجار بيستخدموا السولار في تدفئة الدواجن .

أما بقى لو بتسأل عن تأثير قرار الحكومة برفع أسعار السولار على الخضار في الأسواق ؟

فـ حسين عبد الرحمن أبو صدام نقيب عام الفلاحين قال في تصريحات لـ موقع مصراوي إن قرار الحكومة برفع أسعار السولار هيساهم في ارتفاع تكلفة الإنتاج الزراعي .

وده لأنه كان شايف إن الجنيه اللي زاد في سعر لتر السولار هيزود الأعباء الاقتصادية على المزارعين وهيرفع أسعار نقل المحاصيل الزراعية ومنتجاتها وكمان هيزود تكلفة تجهيز الأرض الزراعية والري وأجرة العمالة
وبكده هنشوف زيادة في أسعار الأعلاف والخضار والفاكهة واللحمة.

دلوقتي قولنا رأيك في قرار الحكومة برفع سعر السولار وهل شايف إنه فعلا هيتسبب في زيادة أسعار السلع ؟