بمناسبة ظهور نتائج الثانوية نتعرف معكم علي أغرب وأقل مجاميع لفنانين مصريين في الثانوية العامة، لنوضح بان الثانوية العامة ليست نهاية المطاف.
وياما ناس فشلت فيها فشل ذريع وبعد كده طلعت كملت في حياتها ونجحت وغالباً محدش بيشتغل بشهادتة عموماً والدليل علي كده نتائج الفنانين العجيبة إللي هنقول لك عليها دلوقتي إللي تعتبر سيئة جدا ومنهم إللي سقط 8 سنين في الثانوية العامة لحد ربنا ما وفقه ونجح في السنة التاسعة زي الفنان أمير كرارة، وجاب مجموع 52%، بفضل درجات التفوق الرياضي وأصبح بعد كده نجم مصر والعالم العربي وقدمنا مجموعة من أروع الأفلام والمسلسلات زي حرب كرموز وكزبلانكا ومسلسلات زي سري للغايه والإختيار.
اما الفنان أحمد حلمي فأعلن في تصريحات تلفزيونية سابقة أنه سقط في الثانوية العامة مرتين ونجح في التالتة بأعجوبة، وأكد أنه في المرة الأولى حصل على مجموع 3% وفي العام التاني حصل على 24% والتالتة والأخيرة حصل على مجموع 50%.
والفنان الراحل طلعت زكريا فشل في الحصول على مجموع مرتفع في الثانوية العامة بـ52%، وفي السنة إللي بعدها عمل تحسين مجموع، ولكن المفاجأة أنه جاب 50% بس، فدخل معهد الفنون المسرحية.
أما بقي الهضبة الفنان عمرو دياب جاب 60% ودخل بعدها معهد الموسيقى العربية،
ودلوقتي لو أنت جدع عزيزي المشاهد روح أدخل حفلتة هتلاقي نفسك محتاج تذكرة ب 10 الآلاف جنيه وغالب مش هتلاقيها وإن لقيتها مش هتعرف تدخل برضه بسبب الزحمة وهيمنعك أفراد الأمن زي ما حصل في حفلة العالمين بتاع أمبارح وهتحط التذكرة في جيبك عشان تحتفظ بيها تذكار وتروح بيتكم .
القايمة كمان بتضم الفنان ماجد المصري إللي جاب 54% ودخل كلية الشريعة والقانون في جامعة الأزهر والفنان الكوميدي محمد هنيدي اللي جاب في الثانوية العامة مجموع 57.5%.
وعن الفنانات الفاشلين في الثانوية العامة فهنلاقي عبير صبري إللي جايت 61% وكان السبب في حصولها على المجموع المنخفض ده إصرار والدها على أنهل تدرس علمي رياضة رغم كرهها للحساب، ودخلت كلية الحقوق.
أما الفنانة الجميلة روبي هوباااا فجابت مجموع 60% من القسم الأدبى ومخافتش تداري كده ولا تداري كده .. وهي خريجة كلية الحقوق ببني سويف لأن مجموعها حتي مدخلهاش حقوق القاهرة.
وفي الختام تفتكر لو كان الفنانين الحلوين دول نجحوا بمجموع عالي وجابوا 99% كان إيه هيكون مصيرهم دلوقتي
