يقولوا إن الفنان الذي بضحك ليس شرط أن تكون كل حياته وردي ومليئة خفة دم في الحياة العادية لأن الطبيعي بين البشر يكون في خير وشر والحياة متقلبة، المهم إنه لم يكن أحد يتوقع إن نجم بحجم محمد هنيدي يكون بينه وبين زملائه العديد من المشكلات.
طيب إيه الحكاية وإيه قصة العلاقة المتوترة بين محمد هنيدي وكريم فهمي، ده غير كمان إن في مشاكل تانية عاملها، هنعرفها في هذا التقرير:
اللي كتبه كريم فهمي سبب الأزمة
وزي ما في تعليقات إيجابية حوالين عمل فني في تعليقات سلبية بردوا حتى لو لسه الفيلم منزلش ونزل البوستر بتاعه بس وده اللي حصل مع فيلم “أنا لحبيبي” اللي قام ببطولته الفنان كريم فهمي، واللي معجبتهوش الآراء السلبية على بوستر الفيلم وقال في بوست ليه على حسابه في فيسبوك إنها لجان إلكترونية قررت تهاجمه وإن اللي مشغل اللجان دي واحد هو يعرفه كويس من وقت طرح فيلم “ديدو”.
وقال كريم فهمي: “لكل جمهوري في الهند والفلبين وشرق آسيا وصلني ردود الفعل الغاضبة على بوستر الفيلم أنا لحبيبي، أنا بتوجه ليكم بالأسف والأسبوع القادم هينزل الإعلان مدبلج هندي وفليبيني وأحب أعرف رأيكو، يابني بقى كفاية دفع فلوس هتفلس أنا خايف عليك من وقت ديدو”.
المهم الكلام ده معداش كده زي أي حاجة ممكن تعدي عشان الجمهور مبيفوتش ووش كده طالما جاب سيرة فيلم “ديدو” يبقى يقصد الفنان محمد هنيدي، ومن وقتها والجمهور عارف إن في بين الاتنين مصانع الحداد لدرجة إن كريم فهمي فضل يتكلم عن موضوع اللجان دي وقال إن الأهم من النجاح إننا نفرح لنجاح غيرنا لكن دول بقوا قليلين أوي دلوقي، وإن فيه كتير عايز يفشلك أسهل من إنه ينجح.
أزمة فيلم ديدو بين هنيدي وفهمي
من وقت ما أعلن كريم فهمي عن طرح فيلم “ديدو” من كام سنة قال إنه بيتكلم عن مشكلة “عقلة الإصبع” وده في الوقت اللي كمان هنيدي أعلن فيه إنه بيعمل فيلم عن قصار القامة واسمه “عقلة الإصبع” واللي بالمناسبة لسه مظهرش للنور لحد دلوقتي عكس فيلم “ديدو” اللي كريم لحقه بسرعة وعرضه ومحدش يعرف إيه اللي دار في الكواليس بخصوص الفيلم ده واللي بسببه في ضرب من تحت الحزام لحد دلوقتي، ومحدش عارف لما قال كريم فهمي في البوست بتاعه إن في تربص بيه وبشغله من وقت فيلمه ده وراه هنيدي ولا لأ بس الجمهور فاهم كل حاجة وبيعرف يتوقع صح.
هنيدي وإسماعيلية رايح جاي
بس واضح إن محمد هنيدي واخد على الأزمات دي مع أصحابه من زمان وده اللي قاله محمد فؤاد لما ظهر في برنامج العرافة في رمضان اللي فات لما اتكلم عن نجاح فيلم “إسماعيلية رايح جاي” وإنه السبب في إن هنيدي يضحك الناس، لأ ده كمان قال إن هنيدي اتعلم منه الالتزام، ورغم كده فؤاد أكد إنه مش بيغير من حد ومفيش اللي يغير منه لإن اللي يغير من صحابه يبقى عنده نقص لدرجة إنه قال إنه كره فيلم إسماعيلية رايح جاي عشان عمل حالة من الكراهية عمومًا واتسبب في غضبه من هنيدي.
والفيلم ده ياجماعة لما نزل السينما حقق أعلى إيرادات في تاريخها في الوقت ده، وحاول هنيدي وفؤاد إنه ينسب نجاح الفيلم لنفسه لحد ما انفجرت الأزمة من كام سنة واللي لسه مستمرة ووقتها فؤاد قلل من قيمة محمد هنيدي الفنية لإن الناس دخلت الفيلم عشان خاطر فن وعيون محمد فؤاد، وإن هو اللي ادى الفرصة لمحمد هنيدي وكمان صرف رغم إنه مش المنتج بتاعه، لكن هنيدي رد وقال إن سبب نجاح الفيلم هو ربنا واللي قاله فؤاد صدمني فيه ولو ركزت معاه هنسى حياتي ومش هشتغل.
معركة هنيدي وعادل إمام
وشكل معارك محمد هنيدي بينه وبين أصحابه مبتخلصش في يوم وليلة وبتطول شوية واللي منعرفهوش بردوا إن في معركة تانية بين هنيدي وعادل إمام بسبب فيلم “رسالة إلى الوالي” ووقتها كان المفروض هنيدي هيشارك في الفيلم لكنه فجأة اعتذر عشان يحضر لفيلم “صعيدي في الجامعة الأمريكية” وده اللي اعتبره الزعيم تقليل منه خصوصًا إنه هو اللي اداله أدوار كبيرة في السينما وأظهره للجمهور.
