القانون المصري الآن لا يترك أي ثغرة دون أن يحلها وهذا لكي يحقق المساواة والعدل في البلد، وطبعا زمان كان معروف إن في ناس بتمنع اهلها من إنهم يستلموا حقهم في الميراث ورغم إن هذا حقهم الشرعي لكن دعني اكلمك بالقانون وأقول لك إن الكلام هذا تغير الآن.
وأي حد هيفكر يعني كده هيتعاقب وعقوبة محترمة هقولهالك دلوقتي، وده لأن القانون بيواجه قضية الامتناع عن تسليم الميراث الشرعي للورثة وده عشان يحافظ على الحقوق بتاعت الناس ويقضى على الظاهرة دي أصلا.
والقانون في مصر حدد عقوبة لأي شخص يفكر يمنع تسليم الورثة أو اي حد منهم نصيبة الشرعي من الميراث، والعقوبة دي هتكون الحبس لمدة متقلش عن 6 شهور وكمان غرامة متقلش عن 20 الف جنيه ومش هتزيد عن 100 ألف جنيه والقانون بيختار عقوبة من دول.
عشان يعاقب بيها اي حد امتنع عن التسليم أو حتى خبى مستند رسمي يأكد احقية الورثة في الميراث
واللي المفروض لو الورثة طلبوا المستند ده إنه يديه ليهم ولو رفض يديه للورثة الشرعين فـ بردو هيتعاقب وفي الحالة دي عقوبته مش هتقل عن سنة حبس.
طب لو حصل وحد عمل معاك كده بس رجع لنفسه وقال إنه خلاص هيسلمك ميراثك وانت كنت بالفعل رفعت قضية، شوف ياسيدي في الحالة دي هيكون في صلح بس مش بينك وبينه ده قدام النيابة أو المحكمة.
واللي لازم تكون حاضرة الصلح دا وتثبته بشكل رسمي وساعتها بتوافق النيابة أو المحكمة بوقف تنفيذ العقوبة وده لو تم الصلح طبعا.
وفي الحالة دي مش بيأثر عليك الصلح بشكل سلبي لأن ده حقك، ولازم تعرف إنه في شروط عشان تقدر ترفع القضية دي، وهي إنه يكون في تركة موجودة بالفعل للورثة والتركة دي تكون تحت إيد واحد من الورثة في حيازته يعني سواء أرض أو دهب أو بيت وهكذا ولازم يكون الشخص ده فعلا ممتنع عن تسليم الورثة الورث بتاعهم
ولو كل الشروط دي اتوفرت فـ انت من حقك وفورا إنك توكل محامي وترفع قضية تسترد بيها الورث بتاعك وكله بالقانون
الأكيد بقا إننا منقدرش ننكر إن القضايا دي موجودة وبكثرة في الصعيد واللي بيشوف أهلها دايما إنه عادي إن الولد ياخد ميراث اخته وإن الست عموما مش من حقها تورث
واكيد شوفتوا وسمعتوا حالات كتيرة حواليكم بالشكل ده اتعرضوا لظلم من أهاليهم واتاخد حقهم في الميراث عيني عينك
لو انت بقى تعرف حد اتعرض للظلم في حقة في الميراث ياريت تقوله على القانون وإزاي ممكن يرجع حقه وبكل سهولة
ولو عارف حد ناوي يعمل كده فـ حذره وده لأن العقوبة مش قليلة
قولنا رأيك في القانون وهل شايف إن الجرايم دي تستحق العقوبات دي؟ وإزاي مصر قدر تتغلب عليها؟
