رثت الفنانة ريهام عبد الغفور، مدير التصوير تيمور تيمور، بكلمات مؤثرة، والذي رحل عن عالمنا أول أمس السبت غرقًا بعد محاولته إنقاذ نجله من الغرق في رأس الحكمة.
وكتبت ريهام عبد الغفور، عبر حسابها الشخصي بموقع فيس بوك: يا حبيب قلبي يا تيمور ياللي أهل بيتك بيقولو عليك كنت حنين وفرقوش وطيب وبتحب أوي جبر الخواطر.. ياللي أهل مراتك بيقولوا عليك لما دخلت حياتهم جبتلهم الأمان والسلام، ياللي أمك بتقول عليك كنت بني آدم حنين وكويس أوي وابن بار، ياللي زمايلك وأصحابك بيقول عليك كنت مسهل عليهم حياتهم.
وتابعت ريهام عبد الغفور: ياللي العمال كانت بتفطر معاك في طبق واحد في اللوكيشن، ياللي مخلص لشغلك، ياللي ضحيت بحياتك عشان تنقذ ابنك، ياللي قعدت تسمعني وانا بقولك أني قلبي انكسر على أبويا وتطبطب عليا، وكنت فاكرة إن عمري ما حتوجع تاني بس فراقك وجعني أوي أوي أوي ووجع كل حد عرفك، كل الناس بتحبك وبتدعيلك وعمرها ما حتنساك، عشان انت سبت أثر وحكاية حلوة عند أي حد عرفك.
واختتمت ريهام عبد الغفور، رسالتها لـ الراحل تيمور تيمور: ربنا يسعدك في الجنة ويجعلك في أعلى درجاتها، ويجمعنا بيك وبالغاليين في الجنة يارب.. أسألكم الفاتحة والدعاء.
عزاء تيمور تيمور
وعلى جانب آخر، كان أقيم أمس، عزاء مدير التصوير تيمور تيمور، في مسجد الحامدية الشاذلية، وقدم واجب العزاء كل من: الفنان أحمد السقا، المخرج كريم العدل، الفنان ياسر جلال، الفنانة ريهام عبد الغفور، صبري فواز، الكاتب عبد الرحيم كمال، دينا فؤاد، المنتج أحمد السبكي، المنتج صفي الدين محمود، السيناريست تامر حبيب، هنادي مهنا، وغيرهم من النجوم.
