أخبار الاقتصاد

رد قوي من وزير المالية على الوكالات العالمية ويكشف مفاجأة بشأن الجنيه

الكل يسأل عن حقيقة خفض المؤسسات العالمية للتصنيف الاقتصادي لمصر ، وهل من الممكن أن تكون تلك التصريحات مؤامرة على مصر؟ ولماذا يزايد البعض على الجنيه المصري؟ وزير المالية أجاب على كل هذه الأسئل تابعونا لمعرفة ما قاله:

كلام كتير الفترة اللي فاتت اتقال بشكل سلبي عن الاقتصاد المصري من مؤسسات مالية طلعت وأعلنت إنها خفضت التصنيف الائتماني لمصر منهم مؤسسة فيتش للتصنيف الإئتماني.

لكن وزير المالية الدكتور محمد معيط طلع واتكلم مع الإعلامي عمرو أديب عن كل اللي شاغل بال المصريين الفترة دي.

ونقلا عن جريدة الشروق وزير المالية قال إنه بمنتهى الأمانة والصدق في تحامل من المؤسسات المالية علينا، فهل ينفع تقارن مصر بدول مصدرة للبترول أم مستوردة ؟ ولا تقارنها بدول مستوردة للمواد الغذائية ولا مصدرة لها؟».

ده كمان اتكلم وقال إن مصر بيصدر عنها حوالي 8 تقارير يوميا من المؤسسات الدولية، وده خلاه يسأل: « هو مفيش في العالم حد بيصدر عنه تقارير إلا مصر، باقي الدول مبيصدرش عنها تقارير يا جماعة ولا إيه؟».

وعشان كده كان شايف إن المؤسسات توقعت مع بداية تحرير سعر الصرف، أن الدولار هيرتفع أمام الجنيه بمقدار 15% بس، لكن بعد كده غيرت كلامها وبدأت تزود النسبة دي.

واتكلم أسباب تأخر إجراءات صندوق النقد الدولي وليه معملش المراجعة الأولى للحكومة المصرية عشان يقدر يصرف الشريحة التانيه من القرض.

وحسب كلام معيط فـ الإجراءات متأخرتش ولا حاجة وده لأنه متمش أصلا الاتفاق بشكل نهائي على ميعاد المراجعة الأولى للصندوق.

وإنه كان مستهدف إن المراجعة الأولى للحكومة المصرية تكون في شهر مارس اللي فات لكن اللي أخر الموضوع شوية هو ظروف شهر رمضان وكمان عيد الفطر.

لكن الصندوق بدأ من تاني اجتماعات الربيع العربي في مدينة واشنطن الأمريكية، وعشان كده معيط توقع إنه يتم المراجعة قبل شهر يونيو الجاي.

أما بقى بخصوص الكلام اللي اتقال من وكالات اقتصاد عالمية كانت بتحاول تشكك في قدرة مصر على سداد الالتزامات والديون الخارجية

فـ وزير المالية اتكلم بكل صراحة في الموضوع ده وقال إن الحكومة قادرة إنها تسدد كل الالتزامات والديون الخارجية خاصة وإن مصر عندها تحويلات المصريين بالخارج وكمان إيرادات قناة السويس والصادرات والسياحة وكل القطاعات دي بتحقق مؤشرات جيدة.

أما بخصوص مشكلة نقص العملات الأجنبيه معيط اتكلم وقال إن في 23 مليار دولار تم سحبهم في 6 أسابيع بس وجه بسبب الازمة الروسية الأوكرانية

وعشان كده كان شايف إننا محتاجين نضاعف احتياطي العملة الأجنبية خاصة وإن 80% من القمح بيجيلنا من روسيا وأوكرانيا و 40 % من إيرادات السياحة المصرية بيكون من السياحة الروسية والأوكرانية وده يبين لينا قد إيه روسيا وأوكرانيا كانوا سبب رئيسي في دخول العملة الأجنبية لمصر.

لكن اللي يطمن إن وزير المالية قال إننا زي ما قدرنا نعدي من الأزمة اللي مرت بيها مصر في 2016 وعلى 2023 هتعدي الأزمة وهنقدر نرجع زي ما كنا وأحسن كمان .

وقال إن الدولة بتعمل على تحسين مستوى معيشة المواطن، وتوفير فرص عمل.

دلوقتي قولنا رأيك في تصريحات وزير المالية وهل شايف إن وضعنا الاقتصادي مستقر؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى