في الاسماعيليه السماء أصبح لونها اسود ومبنى مديريه الامن تفحم..مشاهد صعبه فاق عليها المصريين خلال الساعات الاخيره بسبب حريق مديريه امن الاسماعيليه الذي أصبح الشغل الشاغل للناس والكل يريد أن يعرف ما حدث.
والخساير وصلت لكام؟ طيب ازاي الحكومه اتعملت مع الموقف؟ للاسف الناس صحيت على فيديوهات وصور بتنقل لحظه بلحظه حريق مديريه امن الاسماعيليه واللي بدأ حسب شهود العيان من الساعه 4:00 الفجر.والمشكلة الأكبر كانت وجود أفراد من الداخلية وقوات الأمن في االمبنى وقت بدايه الحريق.
وحسب موقع العربية، تم إرسال فريق أمني تحت إشراف وزير الداخلية المصري لمعرفة أسباب حريق الإسماعيلية، ده غير فريق فني وهندسي وصل إلى مديرية أمن الإسماعيلية لتقييم أضرار الحريق.
وحسب جريدة فيتو، الفحص المبدئي لحريق مبنى مديرية أمن الإسماعيلية كشف عن خساير تقدر بعشرات ملايين الجنيهات، في واقعة محصلتش من عشرات السنين.
بس آخر الكواليس كشفتها وزارة الصحة والسكان، لما أعلنت عن نقل 26 حالة إلى المجمع الطبي بالإسماعيلية، منهم 24 حالة عندهم مشاكل في التنفس ، وحالتين روق، وده غير خروج 7 حالات بعد تلقي الخدمة وتحسن حالتهم الصحية.
وتحيبا لأي ظروف، وزارة الصحة رفعت حالة الاستعداد في مستشفيات محافظة الإسماعيلية، لاستقبال أي متضررين بسبب الحريق.
وحسب شهود العيان، حريق مديرية أمن الإسماعيلية بدأ في الساعات الأولى من صباح اليوم في جزء من المبنى، لكن في فترة قصيرة امتد الحريق عشان يطول المبنى كله ويتسبب في إسقاط الواجهة الرئيسية ليه.
وبعد لحظات من الابلاغ بالحريق دفعت قوات الحمايه المدنيه بإعداد كبيرة من سيارات الإطفاء، كمان وزارة الصحة دقت بـ50 سيارة إسعاف كاملة التجهيز لموقع الحريق، ده غير طياره هليكوبتر ساعدت في اطفاء الحريق
واستمرت محاولات الانقاذ وإخماد الحريق لساعات لدرجه ان رجال الحماية المدنية حاولوا يكسروا أجزاء من سور مديريه امن الاسماعيلية عشان يقدروا يوصلوا للعالقين، كمان تخلصوا من أي مواد ممكن تساعد على استمرار الحريق.
وفعلا نجحوا في اخلاء المبنى بالكامل من قوات الامن والمساجين حسب موقع مصرواي. والعربية
والحمد لله نجحت قوات الامن في اطفاء الحريق بدون اي خساير بشريه لغايه دلوقتي ما صدرش اي بيان رسمي بخصوص الاسباب ورا الحريق، لكن موقع سكاي نيوز بالعربيه استشهد بحوادث سبع حصلت في مصر كان السبب وراها ماس كهربي مفاجئ عادة بيحصل بسبب مشاكل في البنية التحتية وتجهيزات المباني.
ولو تفتكروا في شهر اغسطس اللي فات حصل برده حريق مفاجئ في مبنى وزاره الاوقاف في القاهره ساعتها الداخليه طلعت بيان وقالت ان الحريق حصل بسبب حدوث ماس كهربائي بالتوصيلات والتجهيزات الكهربائيه الخاصه بوحدة التكييف الداخليه بغرفه السيرفرات عشان تمتد النيران الى الغرف مجاوره المجاوره في الدور الاول والتاني.
ساعتها المبنى كان خالي من الموظفين عشان كده ما حصلش اي خسائر في الارواح لكن كل اللي حصل تلفيات في عدد قليل من الاجهزه الكهربائيه زي الكمبيوتر والطابعات.
ودلوقتي الكل في انتظار بيان رسمي يوضح تفاصيل اللي حصل بس الحمد لله ان ما حصلش اي خساير بشرية.
