كان حلمه أن يكون لاعب كرة وتعرض للنصب من طبيب مزيف..أسرار الفنان أحمد صفوت

شاب وسيم، من أب دكتور وأم شاعرة، اتولد في محافظة بنها خارج القاهرة، وكان عنده حلم وسعى إنه يحققه، حلمه الأول مكنش التمثيل، ولكن الظروف كان ليها موقف تاني، وعشان كدة قرر ياخد الطريق التاني اللي ممكن يقدر يحقق، فقدر يحققه.. هو الفنان أحمد صفوت

الفنان أحمد صفوت واحد من أهم الوجوه على الشاشة، منقدرش نقول وجوه شابة برغم سنة، لأنه مبقاش بينطبق عليه اللفظ ده، فهو من الوجوه الناضجة والنجاحة والمميزة، وبينه وبين البطولة المطلقة حاجات بسيطة، وإن كان فتح بابها ورجع تاني في مسلسل «فض اشتباك».

يمكن أحمد صفوت وهو صغير زي شباب كتير كان حلمه يكون لعيب كورة، ولكن الوضع مكنش يسمح بكده، والده الدكتور كان ليه رأي تاني ومكنش مهتم أصلا باللعبة وشايفها تضييع وقت، وعشان كدة هو قرر ياخدها من قصيرها ويمشي في السكة اللي يقدر عليها.

والدته هي الشاعرة المعروفة الراحلة وفاء وجدي، ومن خلال مكتبها ومكتبة الأب في البيت، كان بيستعين بالكتب والنصوص الموجودة ويقرأ منها ويمثل كمان، وبعدين خد قرار إنه يدخل المعهد العالي للفنون المسرحية، وقد كان.

بدايته الفنية كانت من خلال أدوار صغيرة، ولكن التمهيد الأول لظهوره كان من خلال مسلسل «سكة الهلالي» اللي منه شافه الفنان الراحل نور الشريف واختاره عشان يشارك في مسلسل «الدالي» ولعب دور خالد الدالي واللي بسببه حقق نجاح كبير، وخد جايزة أفضل وجه صاعد، وهنا كان حط إيده فعلا على أول خطوات مشواره الفني.

ومن الدالي لأفراح إبليس، لكيد النسا والريان، فضلت نجومية أحمد صفوت تكبر وتزيد، لحد ما وصلنا لموسم رمضان الحالي وهو بيشارك في مسلسلين وهما سره الباتع والأجهر.

الموسم ده بيعمل دور ميدا في الأجهر وتقريبا هو دور البطل التاني، وفي سره الباتع بيعمل دور الظابط نديم، واللي مشهد استشهاده كان حديث السوشيال ميديا.

الفنان أحمد صفوت قدم خلال مسيرته عشرات الأعمال الفنية، وبيهتم بالتنوع طول الوقت عشان يقدر يحقق تاريرخ فني مهم.

اتعرض لواقعة نصب شهيرة في 2014، لما واحد ادعى إنه طبيب نفسي وأجر الفيلا بتاعته في الهرم، وجاب ناس عندهم أمراض نفسية عشان يتعالجوا فيها، وبعدين يخلع الراجل المستأجر ده ويطلع نصاب، فيتفاجئ أحمد صفوت بتجمهر من الأهالي عند الفيلا بتاعته بسبب الراجل النصاب ده.

أحمد صفوت من الفنانين اللي عندهم موهبة في التمثيل مميزة، وعنده سمات شكلية تسمحله بإنه يكون من نجوم الصف الأول، وكمان عنده الذكاء في اختيار الأعمال الفنية اللي تناسبه وتضيف لتاريخه، وبيقدر يشتغل على ده بشكل كويس، وبيقول مثلا إنه لما اتعرض عليه دور شامل المغني الشعبي في مسلسل المشوار، دخل عالم المهرجانات وحياة الناس اللي بتغني اللون ده، عشان يقدر يكتسب الصفات والحاجات اللي محتاجها عشان يقدم شخصيته بشكل كويس.