شخصيتها في العمل كان عليها كلام كثير، وفتحت الباب لبعض لمشاكل مجرد ما بدأ التصوير، تشابهت على الناس مع قصة مسلسل آخر يعرض في نفس السيزون، لأن الاثنين تقريبا يعرضوا نفس القضية لكن كل واحد بيكتب بطريقته، المهم إن ما عرض منهم حقق نجاح واستطاع ان يكون له مساحة في مارثون رمضان، نتحدث عن مسلسل ستهم والفنانة روجينا.
مع بداية موسم رمضان ظهر مسلسل ستهم، وده اللي بيتكلم عن ست مكافحة في الصعيد لقيت نفسها لوحدها بعد ما جوزها اتقتل، ومضطرة تربي ابنها، فقررت إن هي تعيش في شكل راجل، عشان تقدر تشتغل وتصرف على العيل ده.
المسلسل قدر يوصل للجمهور بأكتر من طريقة ومنهم أغنيات شيخ المداحين الرائع ياسين التهامي، واللي كمان ظهر كممثل لأول مرة في المسلسل.
الفنانة روجينا بطلة العمل، وتحت قيادة المخرج الكبير رؤوف عبدالعزيز، عملت كل اللي تقدر عليه عشان تقدم الشخصية دي بأفضل شكل ممكن، خصوصا إن هي بتعتبره واحد من أهم الأدوار في حياتها إن مكنش هو الأهم على الإطلاق.
روجينا بقالها كام موسم بتقدم بطولة أعمال فنية ويمكن آخرها كان مسلسل «انحراف» اللي اتعرض في رمضان اللي فات وحقق نسبة نجاح معقولة، وكانت بتقدم فيه شخصية مركبة نفسيا، وكانت مريضة نفسية في العمل، وده من الأدوار اللي تمثيلها بيكون صعب.
من الواضح إن روجينا واللي بدأت تاخد وضعها فنيا خلال آخر كام سنة، عشان تكون من بين نجمات الصف الأول من ممثلات جيلها، بتختار أدوارها بعناية، وبتختار دايما أعمال تظهر قدراتها التمثيلية، مش مجرد أعمال جماهيرية، ولكن هي عندها ثقة كبيرة في إمكانياتها واللي تقدر تقدمه، مع ورق كويس ومخرج كويس.
الموسم ده روجينا طلت علينا بمسلسل «ستهم» ووجهت شكر للمخرج رؤوف عبدالعزيز لأنه ادالها أهم وأصعب شخصية في حياتها الفنية.
يمكن الناس اللي بتهتم بمتابعة كواليس الأعمال هيعرفوا إن روجينا اتبهدلت جامد، وكانت بتتمرمط في التراب عشان تأدي الدور بأكبر قدر ممكن من الواقعية، وكانت مذاكرة الشخصية كويس، لأنه بتمثل واحد من أحلامها.
الفنانة روجينا قبل عرض العمل ظهرت صور ليها وهي حالقة شعرها، والمخرج رؤوف عبدالعزيز غضب جدا بسبب الموضوع ده، لأنه كشف جزء من الأحداث، ولكن الأهم من كدة إن روجينا حلقت شعرها فعلا في الحقيقة مش المسلسل بس.
متخيلين معنى إن واحدة ست تحلق شعرها عشان دور، فأكيد يعني هي بذلت كل اللي تقدر عليه عشان تقم الشخصية بأفضل شكل ممكن.
المسلسل هيلاقي نفسه في منافسة مع مسلسل الفنانة منى زكي «تحت الوصاية» واللي بتتشابه قصته بشكل كبير مع ستهم، وهما الاتنين بيعرضوا نفس القضية، والمعروف غن منى زكي من الفنانات التقال أوي، فالمقارنة والمنافسة بينهم هتكون كبيرة.
