أخبار الرياضة

يقولي يا أستاذ مرتضى| مرتضى منصور يكشف عن شروطه للصلح مع الخطيب

على الرغم من الخلاف الكبير بين المستشار مرتضى منصور رئيس نادي الزمالك وبين الكابتن محمود الخطيب رئيس النادي الأهلي والذي وصل للقضايا والحكم بحبس مرتضى شهر بسبب سب الخطيب.

لكن رغم هذا الخلاف إلا أن مرتضى منصور أعلن عن استعداده للصلح مع الخطيب، ولكن بشروط ، وما علاقة كهربا؟ وكيف ستنتهي قصة غرامة اللاعب؟ وما حكاية كيد النسا؟.. تفاصيل كثيرة نكشفها في هذا التقرير.

كلنا شوفنا الخلاف الكبير اللي بين المستشار مرتضى منصور والكابتن محمود الخطيب واللي فيه جولات كتير من خناقات وهجوم في الإعلام للمحاكم والقضايا واللي لسه مستمرة لغاية دلوقتي.. ورغم أن كل الناس توقعت ان الخلاف بينهم هيستمر ومفيش حد قادر يحله إلا أن مرتضى أعلن في تصريحات له أنه عنده استعداد للصلح وحل كل الخلافات بينهم حتى أزمة الغرامة اللي بتخص اللاعب محمود كهربا هو على استعداد لحلها.

مرتضى منصور قال إن معندوش مشاكل مع الخطيب وعلاقته مع جميع أعضاء مجلس إدارة النادي الأهلي جيدة ومفيش أي خلاف.. لكنه قال إن الخطيب هو اللي في مشكلة من ناحيته معاه لأن الموضوع عبارة عن كيد نسا وان في ناس بتسخنه على الخلاف معه.. حتى في موضوع كهربا كان ممكن ينتهي لولا العناد الكبير اللي عند الخطيب.

رئيس نادي الزمالك علق على الخلاف وقال بالنص: لو العلاقة محترمة، وفيها تحضر بين الزمالك والأهلي مفيهاش كذب ولا كيد نسا ومفيهاش لجان بتشتم 24 ساعة، كنا هنوافق على تقسيط غرامة كهربا.. محمود الخطيب، لو رفع سماعة التليفون وقال يا أستاذ مرتضى، عاوز نخلص موضوع كهربا بطريقة ودية بعيدا عن المحاكم أهلًا وسهلًا به

كمان كمل في تصريحاته اللي كانت على قناة الزمالك، وقال إن هي دي شروطه عشان يكون في صلح مع الأهلي والخطيب، وأن الخلافات دي بتحصل وعمل كده مع 500 نادي فعلى سبيل المثال في عهد سمير حلبية رئيس المصري السابق، كان للزمالك فلوس وحصلنا عليها بعد سنتين لأ في في علاقات محترمة.. وقال كمان إن علاقاته برؤساء الأندية الجماهيرية زي يحيى الكومي ومحمد مصيلحي وكامل أبوعلى علاقة محترمة ومعندهوش مشكلة.

 

مرتضى منصور قال إن الخلاف بينه وبين الخطيب بسبب الحملة اللي الزمالك وعلى مجلس الإدارة وعليه شخصيًا وده اللي مخلي المشاكل بتزيد زي مشكلة كهربا اللي كنا ممكن نوافق على تقسيط الغرامة ومشكلة اللاعب تتحل لولا عناد الأهلي ومجلس الإدارة اللي ماشي بمبدأ كيد النسا.

رئيس الزمالك كمل كلامه وقال إن اللي صعبان عليه في الموضوع كله كهربا، لأن الواد مستقبله ضاع وهو كان لاعب في المنتخب وكان من أفضل لاعبي مصر لكن هو فين دلوقتي؟ ده قرب أنه يعتزل بسبب العند.. ورغم كده عنده استعداد للصلح والتفاهم.. مش بس كده لكن كمان في مباراة لفريق الطائرة للأهلي في الزمالك، ومجلس إدارة القلعة الحمراء هيشوفوا كيف يستقبل مجلس إدارة الزمالك كل البنات في الأهلي ومدير النشاط الرياضي وأي حد من مجلس إدارة الأهلي فوق دماغنا، هيشرفوا ويشوفوا الفرق في المعاملة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى