عرض الإعلامي وائل الإبراشي من خلال إحدى حلقات برنامجه «العاشرة مساءً» شكاوى أهالي عزبة «خضر» بمحافظة الغربية، حيث يهاجمهم حيوان غريب يشبه الكلب بشكل مخيف ويثير الذعر بين الأهالي.
فروى أحد الأهالي قصة هجوم الحيوان عليه قائلًا: «لقيته جاي تحت رجلي اشبه بالكلب، بيلف حوالين رجلي من تحت، قعدت على الأرض وفضلت أضرب فيه عشان يبعد عني مرضيش يبعد عني وكلني من إيدي وصدري».
ومن جانبها، قالت إحدى السيدات إن الحيوان شوه وجهها موضحةً: «كنت رايحة أصلي الفجر زي كل يوم، لقيت عم محمد الغفير بتاع الجامع أتأخر فقعدت على مصطبة قدام الجامعة، ماسكة السبحة وبسبح لقيت الحيوان ده جه هجم عليا وكل صابعي، وبسحب صابعي منها، قامت قايمة عليا وشوه وشي بالشكل ده، وبعدين روحت القصر عشان أتعالج الدكتور قالي أنتي رابع حالة تيجي دلوقتي بنفس الإصابات».
وحكى رجل مسن أحد ضحايا الحيوان الغريب قائلًا «دلوقتي كل واحد فينا بيمشي بسلاح سواء عصايا أو سيف أو سكينة، ووقت ما بندخل المسجد بنقفل على نفسنا».
وأضاف غيره «نحن نعاني بسبب الصرف الصحي لأنه سبب المشاكل كلها، ولازم يشوفوا له حل، إحنا بنخاف وبنقفل على أطفالنا من المغرب، وعايشين في رعب من الحيوانات الضالة دي، والعيال هتروح فين في عطلة المدارس».
ومن جانبه علق الإعلامي وائل الإبراشي قائلًا «دي مشكلة كبيرة والناس دي من حقها ناس تروحلهم وتقولهم إيه السبب، هو إنا عايشين في غابة ولا صحرا، إحنا في مجتمعات سكانية، هل هو كلب ولا إيه، الأهالي عندهم يقين أنهم فعلوا كل حاجة، نحاول نساعدهم وننقذهم، لأن إصابتهم بشعة».
