ابتدى موسم رمضان والمعارك الفنية التي على الساحة بين النجوم بأعمالهم، يكون في برامج، و شغلتها إن تطلع القطط الفاطسة، وتبحث في الكواليس عن القديم والجديد، ومن بين هذه الحلقات ، الحلقة التي ظهرت فيها الفنانة مي عمر، زوجة المخرج محمد سامي، والتي كشفت عن خلاف قديم يجمعها بالفنانة غادة عبدالرازق وبسببه مستحيل يعملوا مع بعض.
الفنانة مي عمر بتشارك من خلال السباق الرمضاني الحالي ببطولة مسلسل «علاقة مشروعة» قصاد النجم ياسر جلال، واللي محقق حالة نجاح معقولة، خصوصا إن النجمين بيتمتعوا بجماهيرية كبيرة، سواء كان ياسر جلال واللي قدر خلال الكام السنة اللي فاتوا إنه يثبت وجوده على الساحة، أو مي عمر اللي خطفت الأضواء بجمالها وطلتها، وكمان إمكانياتها الفنية الجيدة.
يمكن مي عمر بتتعرض لانتقادات كتير، جزء منها بسبب إنها زوجة المخرج محمد سامي، واللي البعض بيعتبر إنه بيفرضها على الأعمال اللي بيكون مخرج فيها، ولكن هي ظهرت وتألقت في أعمال تاني مكنش فيها المخرج محمد سامي، وعلى كل حال ده مينفيش إنها عندها قبول وجمال وطلة حلوة على الشاشة، ولو اتقيمت بمعايير مجردة بعيدا عن أمور تاني، هتقدر تكون ناجحة، وإن كانت مش النجمة الأولى.
المهم لما اتسألت الفنانة مي عمر، هل ممكن تشتغل مع الفنانة غادة عبدالرزاق في عمل فني واحد؟، ردت وقالت مستحيل اشتغل معاها.. طيب ليه مستحيل بقى.. هل في خلاف بيجمع مي عمر وغادة عبدالرزاق؟ الحقيقة إنه لا، هما أصلا مبيشتغلوش مع بعض ولا يعرفوا بعض، ولكن الخلاف الأصلي عمره 10 سنين، وهو بين المخرج محمد سامي وغادة عبدالرازق، وبيرجع لكواليس تصوير مسلسل «حكاية حياة».
بالرغم من إن العمل حقق نسبة نجاح كويسة وقت عرضه، وغادة عبدالرازق قدمت دور كويس، إلا إن الكواليس شهدت خناقات وصلت للمحاضر، والبلطجة، وقصص كتير حصلت وقتها.
القصة بدأت لما قررت غادة عبدالرازق تتدخل عشان تبعد النجم أحمد زاهر من العمل واللي كان راجع من ظروف مرضية صعبة، وبعدين اتدخل المخرج محمد سامي والمنتجة مها سليم، عشان يحلوا الأزمة واتحلت ورجع للعمل، ولكن فضل ده مسمار في نعش علاقتهم متحلش تاني، ولكن هو ممنعش ليلى بنته إنها تشتغل مع غادة عبدالرازق في مسلسلها الجديد «تلت التلاتة».
لكن الخلاف الرئيسي حصل بسبب مدير التصوير هيثم زنيتا وبسبب مشاركة الفنان خالد سليم، لأن هيثم اتدخل بصفته على علاقة بالمنتجة وبطلة العمل غادة عبدالرازق في مرة من المرات، وقرر إن هو ينهي التصوير بمزاجه، وده عمل خلاف بينه وبين محمد سامي، واتدخلت غادة وحلته.
مرة تاني غادة عبدالرازق، مكنتش عايزة الفنان خالد سليم يكمل في المسلسل، ومحمد سامي كان عايزه، وبعد خناقة بينهم، كمل العمل خالد سليم ولكن حصل خلاف بين محمد سامي وغادة عبدالرازق وهما في قعدة مع فريق العمل، عشان هي تشتمه وهو يردلها الشتيمة، فيحصل بينهم خناقة، في تتهمه بإنه حاول يلمس جسمها، وهو بعد كدة اتهمها بإنها جابتله بلطجية البيت عشان يعتدوا عليه بالضرب وسببوله ارتجاج في المخ.
المهم يعني الخناقات دي وصلت لمحاضر في القسم، ولكن نقابة المهن التمثيلية اتدخلت، واتحلت المشاكل والمسلسل طلع للنور، ولكن فضل اللي في القلب في القلب، وده سر الخلاف اللي بيخلي مي عمر مش ممكن تشتغل مع غادة عبدالرازق أبدا.
