أخبار الاقتصاد

احذر من فخ النقود المزورة ..إليك أبسط طريقة لتمييزها حتى لا تقع ضحية

خلال الفترة الأخيرة اشتكى بعض المواطنين من وجود أموال مزورة، وفي الوقت الحالي ومع الحالة الاقتصادية الصعبه التي تشهدها البلاد، أصبح من الصعب أن يقع الشخص ضحية للنصابين والمزورين وأن يجد أمواله فجأة مزورة، لذلك فإننا من خلال هذا التقرير سنوضح بعض النصائح التي تحميك من هذا الفخ، فتابعونا.

الفترة اللى فاتت ظهرت مجموعة بتبيع أموال مزروة الألف جنيه ب350جنيه .هتقولى ازاى وليه وفيه وامتى ونعرف إزاى إنها مزورة هقولك معايا هتعرف كل الجديد ومحدش هيضحك عليك صحصح معايا كده ويالا نعرف التفاصيل كلها من طقطق للسلام عليكوا.

بعد إنتشار أخبار الفلوس المزورة ،كل واحد جرى الكام ألف اللى مدكنهم فى الدولاب يطمن عليهم وده لما ظهر مجموعة جروبات على الفيس بوك كل اللى بيعملوه بيبعوا ويشتروا فلوس مزورة، وكله على عينك يا تاجر مش مثلا خايف ولا محرج ولا حاجة لا سمح الله لا بكل بساطة ينزل إعلان عن بيع الفلوس دى.

لا وخلى بالك ده بيبيع ال1000 جنيه المزورة ب350 ج وفرز أول كمان، تحت مسمى مصلحة الناس إنتو مش شايفين الحالة الإقتصادية للبلد عاملة إزاى هتبقى الفلوس كمان عبئ عليهم لا نطبع فلوس والشعب يهيص .

ومع انتشار الجروبات والصفحات دي ، الناس بدأت تخذر بعضها، وواحد منهم كتب وقال: البوست ده في منتهى الأهمية .. عشان لما بالصدفة الاقي جروب عام اسمه ” فلوس مزوره ” و عليه 65 الف عضو و ناس بتطرح فلوس مزوره بدقة و بتتباع بقيمة أقل من قيمتها السوقيه باكتر من 50% .

وبما إن أى حد فينا معرض يضحك عليه في القصة دي، الخبير المصرفي، محمد البيه، قال إن البنوك تقدر تكشف الفلوس المزورة بكل سهولة، من خلال الماكينات المتوفرة عندها، كمان اللي شغالين في البنوك عندهم خبرة كبيرة عن طريقها يقدروا يعرفوا الفلوس المزورة بمجرد مايشوفوها.

والأخطر بقى إن فى ناس كتير بتسأل على شغل الفلوش المزورة دى وبتدور عليه ،ومش بس كده لا بتشترى منه كميات كبيرةبيتعاملوا معاها زى ازمة السكر والرز والعيش لأحس فى يوم من الأيام تحصل أزمة فلوس ولا حاجة يبقى هو مأمن نفسه.

ماتقوم تطمن على فلوسك؟ وتشوف اللى مكمرهم فى الدولاب كده واللى فى جيبك ده لو فيه فى جيبك يعنى مزروة ولا حقيقة ؟

كيف تميز النقود المزورة؟

بص ياسيدى فى علامات كده لو شوفتها فى العملات دى إعرف على طول إنها مزورة ومش بس كده بلغ كمان إنك إتعرضت لموقف زى ده بحيث تحمى غيرك إنه يقع فى الفخ ده . لانك كده بتخسر فلوسك وبتعرض نفسك للمسائلة القانونية، ومش بس كده مباحث الاموال العامة هتجيهم هتجيهم زى ما قبضت على غيرهم كتير قبل كده.

ملمس العملة مثلا العملة الأصلية بتكون خشنة، لكن المزورة ملمسها ناعم زي الورق المطبوع، كمان العملات الأصلية ألوانها زاهية وواضحة، أما العملات المزيفة ألوانها متداخلة وباهتة ، وايما الشريط الفضى الموجود فى الفلوس الحقيقية بيكون لامع على عكس الفلوس المزروة بيكون مايل أكتر للأسود.

والعلامات المائية على الفلوس الأصلية بيختلف شكلها من فئة للتانية، وفي بروز عند الأرقام المكتوبة لفئة العملة وقيمتها، وهتلاقي برضه خط واضح اسمه خط الضمان.

كمان الفلوس الأصلية فيها رسوم هتشوفها كاملة لو حركتها في الضوء بزوايا مختلفة، زي رسمة أبو الهول كده ولو مزروة هتبان الصور دى من غير ما تعرضها للضوء عادى.

كمان ممكن من خلال المية تعرف إنها مزروة ولا لا هتقولى إزاى؟ بص يا سيدى مش هتاخد الورقة أم 200 وتبوشها فى المية لا تبقى مصيبة لو كانت حقيقية ويبقى عليه العوض ، كل اللى هتعمله هتبل صوباعك وتفرك بهل ال200 ج مثلا لو إتمسحت تبقى مزروة ولو حقيقة هتفضل نفس الرسومات بنفس ألوانها وتبقى إطمنت على فلوسك.

واخيرا بقى، كل فئة من فئات العملة الأصلية مكتوب عليها أرقام مسلسلة منسوخة 4 مرات فى أماكن مختلفة، أما العملات المزيفة الأرقام المكتوبة بتكون عشوائية، كده أنا قولتلك تفرق ازاى بين الفلوس المزورة والحقيقية والدور عليك إنت بقى ركز كده وحط عينك وسط راسك.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى