أخبار الاقتصاد

البنك العربي الافريقي ينافس البنوك الحكومية ويصدر شهادة أميرالد بفائدة مرتفعة

بأعلى سعر فائدة على شهادة الادخار الثلاثية في السوق، ولأول مرة بعد قرار البنك المركزي باعتماد سعر صرف مرن للجنيه، بنك خاص ينافس أكبر 3 بنوك حكومية في مصر من خلال شهادة اميرالد الجديدة. فياتري ماهي تفاصيلها ومميزاتها ؟ تابعونا لمعرفة التفاصيل:

البنك العربي الإفريقي الدولي، أعلن عن طرح شهادة ادخار جديدة لمدة 3 سنوات تحت شهادة “اميرالد” بعائد يصل إلى 17.25% سنويا، وبدوريات صرف متنوعة، عشان تناسب احتياجات كل العملا.

وبكده البنك العربي الأفريقي يكون بينافس 3 بنوك حكومية بيطرحوا نفس الشهادة تحت اسم الشهادة اللاتينية في البنك الأهلي، وشهادة القمة في بنك مصر، وشهادة بريمو جولد في بنك القاهرة.

والعائد على شهادة اميرالد متقسم حسب اربع دوريات مختلفة، الأول العائد السنوي بفايدة 17.25%، والعائد التاني بدورية صرف كل 6 شهور وبفايدة 16.50% ، والعائد التالت بدورية صرف كل 3 شهور بفايدة 16.25%، واخيرا العائد الرابع كل شهر بفايدة 16%.

والشهادة الجديدة متوفرة لكل العملاء من الافراد حتى القصر، وتقدر تشتريها بفئة 1000 جنيه و مضاعفاتها بس اعمل حسابك أقل مبلغ تشتري بيه هو 5 آلاف جنيه.

وعن طريقها تقدر تستفيد بمميزات حزمة برامج تمويل “فاليو بلس” المضمون من البنك العربي الأفريقي الدولي، وكمان تقدر تطلع بطاقة ائتمان سواء كانت فيزا أو ماستر كارد بضمان الشهادة، وبحد اقصى 97 % من قيمتها.

طيب افرض احتجت فلوس بعد ربط الشهادة تعمل إيه؟ في الحالة دي من حقك تسحب فلوس على المكشوف بضمان الشهادة بس بحد اقصى 90% من قيمتها.

ولو مش عاوز قرض ومحتاج الفلوس ضروري تقدر تسترد قيمة الشهادة بعد مرور 6 أشهر من تاريخ إصدارها، بس خلي بالك في الحالة دي هتدفع حاجة اسمها عمولة كسر بتتخصم من العوائد بتاعتك.

ودي قيمتها بتختلف حسب تاريخ الاسترداد، وهتلاقي جدول في البنك بيوضح قيمة المبلغ المخصوم لو طلبت الاسترداد في السنة الأولى أو التانية أو التالتة.

كمان ساعتها موظف خدمة العملا في البنك العربي الأفريقي هيقولك هتخسر كام بالظبط عشان تاخد قرارك على اساس ص.

ودلوقتي في سؤال مهم، تعرف ازاي ان الشهادة هي اختيار مناسب ليك؟ الإجابة هنا متقسمة ل3 حاجات:

الأولى: لو لقيت العائد بتاعها كويس بيغطي معدل التضخم اللي في البلد وبكده تحافظ على قيمة فلوسك ومتقلش في اسوأ الاحوال

والتانية: لوانت ملكش في الاستثمار ومش فاضي تتابع أسعار الدهب والبورصة عشان تعرف تشتري أو تبيع امتي

و التالتة بقى لو انت محتاج عائد ثابت ومضمون كل فترة معينة عشان يساعدك على ظروف المعيشة اللي بقت غالية اوي مع ارتفاع الأسعار.

انتوا كمان شاركونا برأيكم وقوللنا هل شايفين شهادة الادخار هتكون استثمار كويس من وجهة نظركم؟ ولا الدهب أمان اكتر؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى