الشهور الأخيرة أسعار الذهب كانت حديث ناس كثيرة وهذا لأنه جاء في فترة من الفترات و أرتفع بشكل كبير جدا وبعدها عاد ينخفض من جديد.
لكن السؤال هنا أسعار الدهب وصلت لفين؟ ومين المتحكم في سوق الدهب؟ وليه أسعاره مش مستقرة؟ وهل هيتم مد فترة السماح للمصريين بدخول الدهب من غير جمارك 6 شهور كمان؟ وهل فعلا الطلب على السبايك والجنيهات قل؟
كل ده وأكتر هتعرفه بس تابعنا في التقرير التالي:
أسعار الدهب الفترة الأخيرة مكنتش مستقرة وكانت ما بين ارتفاع و انخفاض وده بعد ما شهدت الفترة اللي فاتت انخفاضات كبيرة للدهب بعد قرار مجلس الوزراء بإعفاء واردت الدهب من الجمارك
وده خلى ناس كتير تسأل إيه سبب عدم الاستقرار ده ؟
بحسب تقرير لمنصة جولد بيليون لتداول الدهب و المجوهرات إن في تراجع على طلب السبايك في السوق المحلي وده عكس الفترة اللي فاتت كان في إقبال كبير جدًا على طلب السبايك و الجنيهات الدهب.
وده كان سبب أساسي في رفع أسعار الدهب ووصولها لـ 2800 جنيه وده أعلى مستوى تاريخي الدهب وصل ليه.
وقال كمان إن تذبذب الأسعار اللي موجود في السوق المحلي حاليًا ده نتيجة اعتماد حركة الدهب بشكل كبير على أوضاع السوق العالمي ده بالإضافة لغياب التطورات في السوق المحلي.
وده بيدل على عودة تسعير المحلي مع التسعير العالمي إلى حد ما وده بحسب ما نشره موقع القاهرة 24، لكن السؤال هنا أسعار الدهب في السوق المحلي وصلت فين؟
بحسب جولد بيليون سعر الدهب انخفض خلال الأسبوع اللي فات بنسبة 1% و لو الوضع في مصر استمر في الاستقرار من غير أي تغييرات اقتصادية أو سياسية
أسعار الدهب هتنخفض اكتر وهتوصل لـ 2200 جنيه خلال الصيف وده بسبب تزايد أعداد القادمين من الخارج وبالتالي زيادة واردات الدهب
وبحسب تصريحات سابقة لأمير رزق خبير المشغولات الذهبية في المصري اليوم إن سبب انخفاض أسعار الدهب الفترة الأخيرة يرجع لعاملين، الأول هو انخفاض الطلب على الشرا خلال الأيام الأخيرة وعشان كده السعر اتراجع.
وقال إن كل ما انخفض الطلب على الشرا كل ما السعر ينخفض وده وفقا لقانون العرض و الطلب، أما العامل التاني اللي بيتحكم في سعر الدهب هو السعر العالمي وده كان مستقر نسبيا خلال الفترة الأخيرة.
وبحسب تصريحات ناجي فرج مستشار وزير التموين للمصري اليوم إن الفترة الجاية أسعار الدهب هتنخفض وأسعاره هتكون بنفس السعر العالمي.
لكن ده هيتم في حالة واحدة وهي مد قرار السماح للعائدين من الخارج بالدخول بالدهب 6 شهور تانين وده لأن القرار ده حقق نجح كبير في انخفاض أسعار الدهب الفترة اللي فاتت.
وعلى فكرة ده قال كمان إن المتحكم في سعر الدهب هي الأوضاع العالمية الحالية اللي بتتحكم في سعره دلوقتي بشكل كبير.
طيب بالنسبة للأسعار العالمية وصلت كام؟بحسب اليوم السابع أسعار الذهب العالمية استقرت لأدنى مستوياتها من أكتر من شهرين وده بسبب بدأ حل أزمة سقف الدين الأمريكي ووقف رفع الفايدة
وده أدى لضعف معدن الدهب كملاذ آمن وتراجع الطلب عليه، ودلوقتي قولنا شايف إن ده السعر المناسب للدهب؟
