كلها ايام والبنك المركزي سيجتمع بتاريخ 18 مايو، لكي يحدد مستقبل سعر الفائدة في مصر الفترة القادمة.والسؤال الآن هل توجد نية لطرح شهادات ادخار جديدة يعد الاجتماع القادم؟ ،لكن لكي نجيب على هذا السؤال نحتاج أن نعرف نعرف ما أفضل 5 شهادات في مصر حتى الآن، وهل العائد عليها مناسب ولا محتاج يزيد؟
خلال الفترة اللي فاتت وبعد رفع المركزي لسعر الفايدة 2% في اجتماعه الأخير بتاريخ 30 مارس، اتنافست البنوك على إصدار شهادة ادخار جديدة بعائد مرتفع.
وفي المقدمة تيجي الشهادة الثلاثية البلاتينية ذات العائد الثابت من بنك الاهلي أو شهادة القمة من بنك مصر:
الشهادتين تقدر تشتريهم بداية من ألف جنيه والفايدة عليهم ثابتة بقيمة 19% والعائد بتصرفه كل شهر
وبعدهم تيجي الشهادة البلاتينية ذات العائد المتدرج أو شهادة ابن مصر من بنك مصر، وبرضه الاتنين نفس الشروط والفايدة.
يعني تقدر تشتريهم من اول ألف جنيه بس الفايدة متناقصة 22 % على السنة الأولى. و18% للسنة التانية و16% للسنة التالتة.
وعندك كمان شهادة بنك التعمير والاسكان، مدتها 3 سنين وتقدر تشتريها بداية من ألف جنيه والفايدة عليها ثابتة 20% سنويا لو هتاخد العائد سنوي، أو 18.5% لو العائد شهري، ودي تعتبر أجدد شهادة نزلت البنوك من أيام قليلة..
وبرضه متاح تشتري شهادة الخير من البنك الزراعي، ودي زي باقي الشهادات مدتها 3 سنين والحد الأدني للشراء ألف جنيه، بس الفايدة 19% لو اخترت دورية صرف العائد تكون كل شهر، أو 19.25٪ لو اخترت دورية العائد كل سنة.
أما بقى بنك ناصر الاجتماعي فبيطرح اكتر من شهادة بس ابرزهم شهادة تراكمية مدتها 3 سنين بفايدة 22% سنويا، وشهادة مدتها سنة ونص بفايدة 20%، بس خد بالك صرف العائد في نهاية تاريخ الاستحقاق.
كمان هي الشهادة الثلاثية من البنك المصري الخليحي مدتها 3 سنوات والفايدة عليها اول سنة 23%، بس الفايدة في تاني وتالت سنة متغيرة، يعني مساوية لسعر الإيداع في البنك المركزي، والنسبة بتزيد أو بتقل حسب قرار البنك المركزي لسعر الفايدة.
واخر شهادك بقى من بنك التنمية الصناعية بعائد 39% هتاخد مقدما في تاني يوم للشراء، والشهادة مدتها 3 سنوات واسمها «اختيارك ذات العائد المدفوع مقدمًا»، لكن يبدأ إصدار الشهادة بمن 50 ألف جنيه
ودلوقتي بقى بعد ماعرفنا افضل شهادات الادخار في البنوك نيجي لسؤال مهم: هل دي اخر شهادات بفايدة مرتفعة ولا ممكن البنوك تنزل شهادات جديدة، وخصوصا انه في اجتماع للبنك المركزي 18 مايو الجارى؟
لغاية دلوقتي الخبرا اختلفوا منهم اللي توقع تثبيت الفايدة، زي الدكتور محمد عبدالهادي، خبير أسواق المال، في كلامه للمصري اليوم.
واتفقت معاه الخبيرة سهر الدماطي، وفي نفس الوقت استبعدت طرح شهادت ادخار جديدة بفايدة أعلى مع وجود شهادات حالية بأسعار فايدة تتراوح من 19 إلى 22%.
وعلى الناحية التانية الخبيرة حنان رمسيس توقعت رفع الفايدة بنسبة 1% نقلا عن جريدة الأهرام..
وعلى فكرة، محمد الاتربي رئيس بنك مصر في وقت إصدار الشهادة ذات العائد المتناقص أو المدرج، قال إن العائد على الشهادة مناسب جدا، وخصوصا مع توقعات انخفاض التضخم الفترة الجاية، عشان كده الفايدة على الشهادة بتقل كل سنة 22% وبعدين 18% وبعدين 16% زي ماقلنا في أول التقرير.
ودلوقتي بقى يهمنا نعرف رأيكم هل شايف العائد الموجود عاليا على شهادة الادخار في مصر مناسب ليك ولو معاك قرشين هتربطهم في شهادة؟
شاركونا في التعليقات
