إن كنت تبحث على شهادة توفر لك عائد جيد وفي نفس الوقت تكون في بنك حكومي فإن هذا التقرير من أجلك وهذا لأن بنك مصر الفترة الماضية كان قد اعلن عن شهادات بعائد مرتفع تستطيع ان تستثمر فيها فلوسك وتحميها من خطر التضخم
ناس كتير بتدور على شهادات البنوك الحكومية الجديدة عشان يقدروا يستثمروا فيها فلوسهم وكمان يلحقوا يشتروا قبل اجتماع البنك المركزي اللي جاي يوم 18 مايو.
واحنا النهاردة هنقولك على اكتر من شهادة بيقدمهم بنك مصر بعائد مرتفع وهتقدر تختار منهم اللي يناسبك، في البداية عندك الشهادة اللي كام طرحها بنك مصر بعائد 19% وده عائد ثابت لمدة 3 سنوات وبيتم صرف العائد ده بشكل شهري، بس خلي بالك إنت هتقدر تشتري الشهادة الجديدة من 1000 جنيه ومضاعفاتها.
ولو عايز تحسبها كويس فـ لو قدمت على شهادة بنك مصر بعائد 19% بقيمة 100 ألف جنيه هتقدر تاخد عائد شهري 1500 جنيه وده لمدة 36 شهروعندك بردو شهادة “ابن مصر ” ودي بتكون لأجل 3 سنوات والعائد بتاعها متناقص،
وبتوصل نسبة الفائدة السنوية لـ 22% في السنة الأولى، ولـ 18% للسنة الثانية، و16% للسنة الثالثة، وبتقدر تصرف العائد بشكل شهري،والجميل إنه بيوصل الحد الأدنى لشرائها لـ ألف جنيه ومضاعفتها.
ومع قرب اجتماع البنك المركزي واللي مفترض يكون يوم 18 مايو بيبدأ كتير من المواطنين يدوروا على خبر الاعلان عن شهادات جديدة وده عشان يحافظوا على فلوسهم تحسبًا لأي قرار جديد.
لكن تفتكروا هل فعلا البنوك ممكن تطرح شهادات جديدة بفايدة أعلى الفترة الجاية ؟احنا اتعودنا إن طرح شهادات جديدة كان مرتبط دايما برفع سعر الفايدة
ولو فاكرين تم طرح شهادة الـ18% حصل بالتزامن مع تعويم الجنيه في مارس 2022, وطرح شهادة الـ 25 % حصل مع تعويم الجنيه في يناير 2023.لكن الخبراء الفترة دي شايفين إن البنك المركزي ممكن يثبت سعر الفايدة منهم،.
منهم الخبيرة المصرفية سهر الدماطي، الخبيرة المصرفية، واللي توقعت في تصريحات لموقع مصراوي إن البنك المركزي يثبت سعر الفائدة في اجتماعه الجاي، وده عشان يتجنب أي نتائج سلبية ممكن تحصل لقطاع البنوك وشركات القطاع الخاص.
وقالت كمان إنها شايفه إن الاستمرار في زيادة رفع الفائدة هيتسبب في حدوث مخاطر تراجع معدل الاقتراض في البنوك
وقالت كمان في تصريحات لـ جريدة الأهرام إن لجنة السياسة النقدية بالبنك المركزي ممكن تاخد قرار بتثبيت سعر الفائدة في الاجتماع الجاي ليها، كمان رجحت عدم إصدار البنوك أي شهادات ادخار جديدة خاصة مع وجود شهادات بفائدة تتراوح بين 19 و22%.
دلوقتي قولنا لو معاك قرشين على جنب هتفضل تشتري من شهادات بنك مصر؟ ، ولا تستنى على أمل طرح شهادات جديدة بعد اجتماع البنك المركزي؟
