أخبار الاقتصاد

قانون جديد لـ«الضريبة على الدخل» لكل المصريين..احسب ضريبة دخلك بنفسك

المصريين قلقين من القانون الجديد الذي تعمل عليه وزارة المالية بشأن تعديلات شاملة على ضريبة الدخل، فما معنى هذا الحديث وهل سيؤثر على المرتبات وسخصم منها ضرائب أكثر؟ وكيف يمكنك حساب الضريبة على مرتبك؟ تابعونا من خلال التقرير التالي لمعرفة الرد على كافة التساؤلات.

كلام كتير منتشر بسبب التعديلات الجديدة على قانون الضريبة الجديد على الدخل، والناس خايفة وقلقانة من إنها تأثر على مرتباتهم، خاصة بعد الغلا اللي بقينا بنعيشه وارتفاع معدلات التضخم، طيب هي فعلا ممكن تأثر على مرتبات المصريين الفترة الجاية؟

هقولك ياسيدي حسب تصريحات رامي يوسف مساعد وزير المالية للسياسات والتطوير الضريبي قال إنه هيكون في قانون جديد بالكامل لضريبة الدخل والدولة شغاله عليه دلوقتي والأكيد إنه مش هيقرب بأي شكل من أسعار الضريبة المفروضة بالفعل لكنه هيبدأ يتعامل بشكل جديد يخدم الدولة والمواطنين.
قال كمان إنه بمجرد الانتهاء من مسودته الأولى هيخضع القانون الجديد للحوار المجتمعي، وده عشان ياخدوا فيه كل الأراء ويقدروا يخدموا بيها القطاع الخاص وده لأن القانون القديم كان بيعاني من مشاكل وقصور وده اللي خلاهم يعملوا قانون جديدة يعالجها.

وده معناه إن القانون الجديد هيوفر في الضرايب اللي بيدفعها المواطنين اللي دخلهم قليل أو متوسط أو فوق المتوسط وهيركز على الناس اللي مرتباتها عالية.

أيوة كام يعني ؟بص ياسيدي تعديلات اللي هتم في القانون الجديد هتضمن زيادة حد الاعفاء الضريبي بنسبة 60% ، والتعديلات كانت واضحة وصريحة وقالت إن حد الإعفاء ده هيشمل كل الناس اللي مرتباتهم أقل من 24 ألف جنيه.

يعني تقدر تطمن لأنك لو مرتبك أقل من الرقم ده هتكون معفي تماما من الضرايب ومش هتدفع جنيه اصلا

الله أمال مين اللي هيدفع؟بص ياسيدي التعديلات الجديدة اخترعت شريحة اجتماعية جديدة واللي بالمناسبة هيكون بردو دخلها منخفض بالنسبة للحكومة واللي هيتراوح دخلها الصافي السنوي بين 15 و 30 ألف جنيه بخلاف حد الإعفاء الشخصي، والناس دي هتدفع 2.5% ضريبة دخل بس.

أما بقى الناس اللي دخلها السنوي من 30 ألف جنيه ولحد 45 ألف جنيه ضريبة الدخل بتاعتهم هتكون 10% بدل من 15% ف القانون القديم، ولو دخلك السنوي من 45 ألف جنيه ولحد 60 ألف جنيه هتدفع 15%ضريبة دخل بدل 20% في القانون القديم .

أما بقى لو دخلك السنوي أكتر من 60 ألف جنيه ولحد 200 ألف جنيه هتدفع ضريبة 20% بدل من 22.5% في القانون القديم، ولو أكتر من 200 ألف جنيه ولحد 400 ألف جنيه هتدفع 22.5%، ضريبة دخل والتعديلات الجديدة كمان استحداث شريحة جديدة بسعر 25% للناس اللي دخلها أعلى من 400 ألف جنيه في السنة.

يعني كده القانون الجديد هيقلل نسب الضريبة على الدخل؟

أيوة ياسيدي بظبط كدة، وخلي بالك إن الحكومة هتطبق النظام الضريبى الجديد للدخل ده على الرواتب اعتبارًا من أول يوليو الجاي

طيب ليه الحكومة بتعمل تعديلات ضريبية دلوقتي ؟هقولك ياسيدي المعروف في كل دول العالم إن الشرايح الضريبية وسعر الضريبة على دخل الافراد يتم تعديلة بشكل مستمر وده عشان يبقي مناسب للظروف الاقتصادية اللي بيعيشها المواطن .

عندك مثلا انجلترا بتعمل التعديل على الضريبة كل سنة والدنمارك عملت 6 تعديلات على مدار الـ 12 سنة اللي فاتو يعني تعديل كل سنتين.

وده لأنه لازم تكون ضريبة الدخل مناسبة لدخل المواطن فعلا خاصة مع زيادة التضخم وارتفاع الأسعار، يعني مثلا مينفعش نيجي لمواطن محدود دخل وندفعه ضريبة واللي معاهم فعلا ميدفعوش وده لأن الدولة دايما بتسعى إنها تحقق العدالة الاجتماعية

دلوقتي شاركنا رأيك بكل صراحة وقولنا هل انت شايف إن التعديلات الجديدة على ضريبة الدخل هتحقق العدالة الاجتماعية؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى