ما هو مصير المصريين الذين قدموا على شهادة البنك الأهلي ومصر الجديدة ، أحب أن أبشركم انكم ستصرفوا العوائد على هذه الشهادة خلال أيام فقط من الآن.
طب إزاي ده هيحصل وهل ده معناه إنه محدش هيقدر يقدم على شهادة الـ25% الجديدة خلاص وهيقفلوا التقديم، تعالوا نعرف الإجابة في التقرير التالي:
لو انت اشتريت شهادة البنك الأهلي ومصر الجديدة ف أحب اقولك إن البنوك هتحط أول عوائد شهادة الـ22.5% الشهرية في الحسابات خلال أيام.
ولو انت مواطن مش متابع فلازم تعرف إن البنك الأهلي ومصر طرحوا من حوالي أسبوعين شهادتين ادخار جداد بعائد الـ22.5% شهري والـ25% سنوي، وخلاص يدوب باقي أقل من أسبوعين عشان أصحاب شهادة الـ22.5% يصرفوا أول عائد ليهم.
ده مش بس كد ده الشهادتين جمعوا أكتر من 259 مليار جنيه في أقل من أسبوعين ، وده طبعا بعد إقبال هائل على الشراء شوفناه من جميع المواطنين في كل فروع البنكين الحكوميين في مختلف محافظات مصر.
ده غير كمان إننا شوفنا زحام على ماكينات الصراف الآلي وضغط كبير على تطبيقات الموبايل الخاصة بالبنكين.
طيب هل ده معناه إن خلاص التقديم على الشهادات هيقف؟ حسب تصريحات سابقة لرئيس بنك مصر محمد الإتربي، فـ مدة طرح الشهادتين بعائد شهري و سنوي، هيكون ما بين أسبوع و3 أسابيع، وبمجرد ما تحقق الحصيلة اللي بتستهدفها من الطرح هيقف التقديم عليها فورًا، ونصح المواطنين اللي مقدموش يسارعوا بالتقديم عليها.
و خلي بالك الشهادة البلاتينية بعائد الـ22.5% والـ25%، موجودة في فروع النك الأهلي وبنك مصر وتقدر في البنكين الحكوميين تاخد قرض بضمان الشهادات دي لكن بشرط إنك متستردش قيمة الشهادة إلا بعد مرور 6 شهور من تاريخ إصدار الشهادة الجديدة.
وطبعًا مدة الشهادات دي سنة واحدة بس، والشهادة دي بتستهدف المصريين والأجانب، القاصرين والبالغين كمان، وبيستهدفوا من طرحها السيطرة على التضخم وجلب استثمارات جديدة الفترة المقبلة.
إشادات واسعة بالخطوة
ولاقت خطوة الطرح من جانب أكبر بنكين في مصر، إشادات خبراء الاقتصاد، ممن اعتبروا هذه الخطوة إيجابية للسيطرة على معدلات التضخم ودعم الاقتصاد المصري بشكل كبير.
ويواصل بنكا الأهلي ومصر، اليوم بيع الشهادتين، في فروعهما المنتشرة في جميع أنحاء الجمهورية، بعد عطلتي الجمعة والسبت الأسبوعيتين.
ولو معاك فلوس وعايز تستثمرها في الشهادة الجديدة تقدر تقدم على شهادة الـ25% في البنك الأهلي المصري أو بنك مصر، واللي هيساعدك في تلبية احتياجاتك و مصروفاتك وده لأنها بتقدملك العائد الشهري لمدة سنة .
ها مستنى إيه.. قولنا ليه لسة مقدمتش على الشهادة الجديدة ؟
