عمليات التهريب زادت بشكل كبير خلال الأيام الماضية، كل يوم تقريبا نسمع خبر عن عملية جديدة، هذه المرة العملية كانت تهريب الذهب ، لكن هذه الحكاية عجيبة وغريبة لأن بطلتها غير مصرية وإنما إمرأة أجنبية استطاعت أن تخدع كل المصريين وتقلب عليها مطار القاهرة..فماذا فعلت؟ هذا ما نتعرف عليه من خلال التقرير التالي:
في البداية كده إحنا مش عايزينكم تزهقوا من الأخبار الكتير اللى بنعملها عن عمليات التهريب اللى بتحصل، إحنا بنحاول ننقل ليكم كل اللى بيحصل ونعرضه ليكم في شكل كويس، والحقيقة أن عملية التهريب اللي بنحكي عليها دلوقتي هي الأغرب لأنها عبارة عن قصة عجيبة جدا.
طيب إيه القصة؟ القصه ببساطة إنه كان فيه ست بتحاول تخدع كل سلطات جمارك مطار القاهرة الدولي وتعدى منهم كمية حاجات مهربة من الدهب بالملايين، الست الأجنبية دي كانت جاية من دبي على رحلة للخطوط المصرية.
ولسوء حظها شك فيها مأمور الجمارك بالمطار، الأستاذ هانى محمود، وهى يادوب طالعة من بوابه اللجنة الجمركية وكانت خلاص هانت وهاتفلت باللى معاها.
لكن الأستاذ هانى محمود وقفها وسألها كام سؤال كده، من عينه انتى معاكى ايه؟ فيه حاجه معاكى ممنوعه ولا لا؟ بس الست كان عندها ثبات انفعالى رهيب جدا، ورغم أنها متأكدة انها معاه حاجه بس أنكرت تماما.
مع تفتيش الست ملقاش أي حاجة.. لكن بخبرته في العمل كان حاسس أن وراها قصة مختلفة.. مرر شنطها وكل متعلقاتها على جهاز الفحص بالأشعة تحت الحمراء وبرضو مفيش حاجة.
طيب الحل إيه؟
رجال الجمارك قرروا أنهم يجيبوا سيدة من العاملين في الجمارك عشان يفتشوها شخصيًا.. وبالفعل اتفاجئت أن في واحدة ست من الموظفات هي اللي داخلة تفتشها.. المفاجأة الأكبر أن برضو ملابسها مفيهاش حاجة.. لكنها طلعت مخبية الذهب بطريقة غريبة وهي أنها لافة كله في ملابسها الداخلية عشان محدش ياخد باله ولا يعرف يوصلها.
الكمية اللي مسكوها معها من الدهب كانت كبيرة وكلها دهب عيار ٢٤، وكانت عبارة عن ٢٠ سلسة و٢٧ زوج حلق، و4 فرد حلق تانين، ده بخلاف مجوهرات تانية كتير زي دلايات وكواليهات ومجوهرات بمبالغ مالية كبيرة جدا خاصة بعد ارتفاع أسعار الدهب.
الست دي قصتها بقت حديث مطار القاهرة وإزاي أنها رغم أنها مش مصرية وأجنبية لكنها فكرت تخدع الناس وتهرب الدهب عشان كده قرر تامر قاسم مدير الجمرك بمطار القاهرة تكليف لجنة مكونة من أحمد عادل القط وحسام الشافعي ومصطفى حسن وأحمد عبد الواحد وبسمة حسني ومحمود عباس، لاستكمال التفتيش مع السيدة وتحرير محضر بالواقعة لإثباته فى النيابة.
وبكده تكون السيدة الأجنبية اتقبض عليها زيها زي غيرها من باقي المهربين اللى حاولوا يهربوا حاجات
بالمناسبة ممكن حد فيكم يكون جه فى باله سؤال، هوا الكام جرام دهب اللى اتقبض بسببهم على السيدة الأجنبية دو يعتبروا جريمة وتهريب، والحقيقه الإجابة عن السؤال ده عرفناها من الأخبار واللى بتقول ان دى حاجات تستحق السيدة دفع ضرائب ورسوم جمركية عليها، وطالما هى حاولت اخفائها في ملابسها كده يبقي هى كانت ناوية تهربها، وده يستوجب عمل قضية لها والتحقيق معها.
وكل ده وفقا لقانون مكافحة غسيل الأموال رقم 80 لسنة 2002 وقانون الجمارك رقم 207 لسنة 2022 وقانون الاستيراد والتصدير رقم 118 لسنة 1975.
لحد هنا ونكون وصلنا لنهاية الفيديو، وحابين نسأل حضراتكم سؤال، هى جرائم التهريب هينتهى امتى ؟، ممكن تنتهي أصلا ولا لا؟، اكتبوا رأيكم في التعليقات.
