أخبار الرياضة

أسرار خناقة مرتضى منصور في اتحاد الكرة

أحداث مشتعلة داخل اتحاد الكرة خلال الساعات الماضية بسبب ما حدث بين  المستشار مرتضى منصور وبين المسؤولين فى إتحاد الكرة.

وتصريحات هنا وبيانات هناك ،ومحدش عارف مصير مرتضى إيه،هل مرتضى هيستقيل ،طيب هل هيحل إتحاد الكرة زى ما قال؟ طيب ليه المشادات وصلت بينهم لكده وزعيق وصوت عالى وإيه علاقة حازم إمام ..مش هتصدق الموضوع وصل لإيه!ما تيجوا نعرف طبيعة الخلاف إيه ،مرتضى منصور ميتوصاش طبعا فى تصريحاته يالا نعرف الحكاية فيها إيه..

المستشار مرتضى راح دلوقتى لإتحاد الكرة ،وطبعا إنتوا عارفين المستشار مرتضى لما بيفقد اعصابه بيزعق وصوته عالى وبيهاجم ،اللى بيحصل فى اتحاد الكرة دلوقتى مش موجود فى اى حتة فى العالم ولا حتى فى بلاد تركب الأفيال ..

ده كان كلام مجدى عبد الغنى الساعات اللى فاتت فى برنامجه البلدوزر على قناة الشمس ،والكل بيسأل إيه الل حصل بين مرتضى منصور وإتحاد الكرة؟

بص يا سيدى الخناقة دى كانت بسبب ازمة قيد الصفقات الجديدة علشان الزمالك مدفعش جزء من المديونية..
مجدي عبدالغني قال إن الزمالك فشل في تسجيل صفقاته الجديدة بعد رفض تام من كل أعضاء اتحاد الكرة،وإن الصفقات دى مش هتحصل إلا بعد دفع الزمالك المديونية .

المستشار مرتضى منصور علق على رفض الاتحاد المصري لكرة القدم، قيد صفقات نادي الزمالك الجديدة قبل غلق باب الانتقالات الشتوية في تصريحات تليفزيونية وقال اتحاد الكرة رفض شيكات نادي الزمالك، أنا تنازلت عن 9 ملايين جنيه، اللى هتيجى من الاتحاد الدولي، لمشاركة سيف الجزيزي مع منتخب تونس في كأس العالم،وطلبت من الشركة الراعية إرسال 10 مليون جنيه لاتحاد الكرة، لكده هيكونوا 19 مليون جنيه، ولكن اتحاد الكرة رفض الشيكات.

منصور قال إنهم حطوا أسماء اللاعبين على السيستم فى المعاد وده أهم حاجة، واتحاد الكرة طلب 10 مليون جنيه ،وهو عرض (شيك) مقبول الدفع من حسابه ولكنهم قالوا غن عندهم تعليمات بالرفض
11:30 بالثانية وصلت ووضعت الاسماء في القائمة، ضمنت حقي بوضع الاسماء عند الساعة 11:30، وده هينتهى بدفع المبلغ ولكن إحنا محجوز علينا.

وده طبعا لإن إتحاد الكرة قال فى بيانه إن الفترة المسموحة للقيد رسميًا بموسم الانتقالات الشتوية في الكرة المصرية، من يوم 1 يناير حتى 31 يناير، وكل الأندية عملت قيد صفقاتها بعد قيامها بجدولة مستحقاتها، باستثناء الزمالك.

وقالوا إنهم تواصلوا مع مسؤولي الزمالك، يبلغوهم بضرورة تسوية المستحقات المتأخرة على الإتحاد، قبل غلق باب القيد بشكل رسمي، لكن النادي متواصلش لقيد أي لاعب وفي اللحظات الأخيرة من يوم 31 يناير، حضر مسؤولين الزمالك إلى مقر الاتحاد لقيد لاعبيه: ناصر منسي، أحمد بلحاج ومحمود شبانة من غير جدولة المديونية.

الإتحاد عمل اللى عليه وخاطب الزمالك بدفع الديون المستحقة له سواء نقدى أو عن طريق الشيكات فالزمالك رفض ،وطالبوا بدفع مبلغ بسيط حوالى 75% من قيمتها ،علشان كده الاتحاد أعلن عدم مسؤوليته عن عدم قيد لاعبي الزمالك، وأن ده بيخص إدارة النادي فقط.

طبعا منصور نفى الكلام ده وقال محصلش وأكد أنه عرض منح شيكات تستحق الدفع والتنازل عن مديونيات لصالح اتحاد الكرة إلا أن تم الرفض وكله من ورا حازم إمام . وأكد كمان إن وزير الشباب والرياضة إتكلم مع جمال علام، لقيد الصفقات، لكنه رفض بردوا ، هو مين جمال علام! اتحاد الكرة هيتحل..

كمل وقال المشكلة إن اتحاد الكرة رفض إصدار الكارنيهات، هاخد الكارنيهات غصب عن اتحاد الكرة وهحل اتحاد الكرة.

منصور قال إن اتحاد الكرة رفض وساطة أشرف صبحي وزير الشباب والرياضة لحل أزمة قيد صفقات الزمالك ،ولكن الوزار إكدت إنها لا تتدخل من قريب أو بعيد في قضية قيد لاعبي الزمالك،وأنها تقف مع اتحاد الكرة في الحصول على مستحقاته،ودلا أمور خاصة بالإتحاد..

نيجى بقى لخلافه مع حازم إمام، منصور قال حازم إمام بيعمل معايا كده عشان قولتله لو راجل انزل انتخابات الزمالك قصادي.
أنا زهقت وعلى وشك أقول أنا ماشي.. أنا محروق دمي، بسبب أمور قانونية، الموضوع زاد عن حده. أنا سجّلت كل اللى حصل فى اتحاد الكرة بالصوت والصورة.

حازم إمام طبعا مش هيسكت ورد ب طبعًا كل اللي أتقال ده أي كلام وكذب كالعادة والله العظيم ولا حد كلمني، نفسي أعرف أيه كمية الغل والافتراء اللى عندك ،هتموت وتكره الناس فيا ،بتتبلي على الواحد وحاشر اسمي في أي حاجة، نفسي مرة تقول إنك غلطت ، مش لازم تشيل الناس غلطاتك ،حسبي الله ونعم الوكيل.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى