نجوم كثير من المشاركين في مسلسل جعفر العمدة لفتوا انتباه الجمهور، للدرجة التي جعلت ناس كثيرة تسأل من هم ؟ وماذا كانو يفعلوا قبل ذلك؟
اليومين دول مسلسل جعفر العمدة هو حديث السوشيال ميديا الأول، والناس بقت بتتعامل مع الأحداث وأبطال العمل إنهم حقيقيين، وإن الشخصيات اللي بيقدموها دي موجودة فعلا، لدرجة إن نجوم العمل بقوا بيتعرضوا لإهانات من الجمهور، وطول الوقت الناس بتطاردهم على حساباتهم على مواقع التواصل، أو حتى في التعليقات على أي منشور ليه علاقة بيهم.
يعني الفنانة جوري بكر اللي بتعمل دور وداد بقت تقول إنها بتقفل التعليقات بسبب المضايقات اللي بتتعرض ليها، والفنان مجدي بدر اللي بيعمل دور بلال شامة، الناس عايزة تخطفه وتسلمه لجعفر العمدة، والفنانة بقى مديحة البكري موضوعنا دلوقتي، دي بقت الناس تقول عليها صفرا وقلبها اسود وعشان كدة خست، وكمان عايزين يجيبوا ستات يروحوا السيدة زينب يضربوها، على أساسا إنها عايشة هناك فعلا.
الفنانة مديحة البكري، بتعمل دور شريفة ودي مرات حمادة فتح الله وأم شوقي وكارم ودلال، وحماة جعفر العمدة، وهي طالعة في المسلسل غلاوية كدة، وطول الوقت عمالة تسخن ولادها على جعفر عشان يعملوا معاه مشاكل على أي حاجة، وعايزاهم ينتقموا منه فكل مرة بتلبسهم في الحيط.
الفنانة مديحة بكري عملت الدور بشطارة لدرجة إن الناس بقت بتفكر في خطط عشان تنتقم منها طول الوقت، لأنها بالنسبالهم صفرا، وهل كمان خاسة جدا عن العادي بتاعها الفترة دي، وفي ناس كانوا فاكرين إن هي عيانة ولا حاجة، ولكن هي ردت على سؤال من المتابعين حوالين الموضوع ده وقالت «ولا عيانة ولا حاجة الحمد لله وبعد الشر عني أنا نحفت بعد حزني على وفاة جوزي وبعده أختي التؤام وأعز اتنين من أصحابي اللي يعتبروا اخواتي وكانت ضربات ورا بعض، ويكفيني هم وربنا يبعد عنكم أي هم يا رب.. لكن الحمد لله مش مريضة وزي الفل».
والفنانة مديحة البكري من مواليد 4 أبريل 1968، ومن أبرز أعمالها مسلسل «طلقتك نفسي، والأسطورة، ونصيبي وقسمتك، وهبة رجل الغراب، والعراف»، ومن أعمالها السينمائية فيلم «جدو حبيبي، وكوكب الشرق، وطيور الظلام».
وهي قدرت تستفز جمهورها للدرجة اللي خلت الناس تقول في التعليقات: «أنا مشوفتش في تقل دم الولية أم شوقي فتح الله دي بجد مش ممكن»، وواحد تاني قال: «يا جدعان الولية اللي هي أم شوقي فتح الله دي تنحة تناحه وظفيتها إيه في المسلسل بجد وشها مستفز».
ومديحة البكري بالمناسبة مش المرة الأولى اللي تتعاون فيها مع الفنان محمد رمضان وبنفس الدور لأنها في مسلسل «الأسطورة» ظهرت بدور والدة «تمارا» حبيبة محمد رمضان اللي حاول يخطبها ولكن أهلها رفضوا، وهي أهلها بقى.
