كل يوم الناس تسأل عن سعر الفرخة بقت بكام والبيض بكام، والبانيه بقا الهسهس الموجود، مش معقولة حتى البورصة مابتطلعش كده! بهذه الجملة انتقد الإعلامي عمرو أديب ازمة ارتفاع أسعار الفراخ والبيض، وقال إن لديه الحل والذي سيوفر للمواطنين فراخ بـ 6 صدور بسعر مغري.تابعونا من خلال التقرير لمعرفة التفاصيل
ياترى بتشتروا كيلوا الفراخ بكام؟ ، ناس بتقول 100 وناس بتقول أكتر المهم إنها زادت بأكتر من الضعف خلال الأيام اللي فاتت.
وده اللي خلى الإعلامي عمرو أديب ينتقد الأزمة ويقول إن الفراخ والبيض والبانيه، بقت مفردات عادية بيقولها كل المجتمع المصري وبيسأل عن سعرها وده من بداية الازمة في روسيا وأوكرانيا، ومن وقتها مصر بقت بتواجهه «صراع قوي» في موضوع الدواجن.
وفي تصريحات ليه خلال تقديمه لبرنامج «الحكاية»، المذاع عبر فضائية «MBC مصر، قال إنه خاض معركة زيادة أسعار الدواجن من حوالي 6 سنين بنفسه.
وقال للتجار إن الدولة قادرة تستورد الدواجن من الخارج، و إنها هتعمل كده لو معدلوش أسعارهم.وإنه لما قال للتجار يا جماعة لو مش هتعدلوا، هنجيب الفرخة أم 6 صدور من برا وأهي أرخص من الفرخة بتاعتنا.
ردوا وقالوا طب والبيوت اللي هتقفلها، مصر فيها 7 ملايين مواطن معتمد على الصناعة دي فبقيت أخرس.
وقال إن أسعار الدواجن والبيض والأعلاف بتزيد بشكل يومي، وأنه مش هيعلق على الأخبار المتداولة واللي بتأكد إن أسعار الدواجن هتنخفض في نص شهر مارس الجاي.
لكن عمرو أديب أكد على أهمية دراسة الدولة مقترح استيراد الدواجن من الخارج. وقال إن ده هيحقق التوازن في السوق خلال الفترة الجاية.
وعلق على زيادة الأسعار وقال إن كيلو الفراخ وصل في بعض المناطق لـ100 جنيه وكإن الفرخة بقت مخلوق له قدسية كبيرة، لكن إن شاء الله كله يتحل وتبقى الأمور تمام».
وبشكل مفاجىء أعلن مجلس الوزراء إنه قرر يعفي 19 قطاع صناعي من الضريبة العقارية وبأثر رجعي كمان، وكان من ضمن القطاعات دي مزارع الانتاج الداجني، خاصة وإنها كانت بتمر بأزمة كبيرة الفترة اللي فاتت.وطبعا الخبر ده فرح ناس كتير خاصة التجار والمنتجين.
مش بس كده دي كمان الحكومة أفرجت عن كميات كبيرة من مستلزمات الإنتاج لقطاع الدواجن زي الأعلاف واللي بقت متوفرة في الأسواق وده كان بيعتبر أهم مطلب للعاملين بقطاع الدواجن.
لكن للأسف القرارت دي مساعدتش إن الازمة تتحل وده لأن أسعار الدواجن ارتفعت بشكل كبير خلال الفترة دي وده طبعا بتأثير من كل المشاكل اللي واجهها القطاع الفترة اللي فاتت زي أزمة نقص مستلزمات الإنتاج بسبب نقص الدولار و اللي اتسبب في تأخير بعض مستلزمات الإنتاج في الجمارك، وزيادة أسعار الأعلاف بشكل كبير.
وعشان كده المفروض إنه مع زيادة الإنتاج وتوافر المستلزمات ده يقلل من تكلفة الإنتاج وبالتالي المستهلك يدفع فلوس أقل، والأسعار تقل.
أما رئيس شعبة الدواجن عبد العزيز السيد قال أن أسعار الفراخ في مصر وصلت لـ 120 جنيه وزن كيلو ونصف، وإن استيراد الدواجن من الخارج نفس الوزن هيوصل لـ 95 جنيه بس وده أقل من الدواجن المصرية بـ 25 جنيهًا وإن الاستيراد هيساعد في حل الأزمة..
لكن واضح إن الحكومة هتاخد بكلام عالإعلامي عمرو أديب فعلا وده لأن السفير نادر سعد، المتحدث باسم مجلس الوزراء، قال في تصريحات ليه قريب إن الحكومة حاليا بدأت بالفعل تستورد كميات محددة من الدواجن خاصة مع قرب حلول شهر رمضان اللي بيكون في زيادة في الاستهلاك، وده عشان تسد العجز اللي موجود لكن عملية الاستيراد دي مش هتضر مزارع الدواجن .
قولولنا دلوقتي هل انتوا متفقين مع الكلام اللي الإعلامي عمرو أديب قالوا وهل فعلا استيراد الدواجن من الخارج هيحل الأزمة؟
