مرتضى منصور يفاجئ لاعبي الزمالك ويبدأ في تسريحهم ومفاجأة عن الصفقات الجديدة

المستشار مرتضى منصور يقسو  على الكل في نادي الزمالك، ومن الواضح أن هناك حملة تغيرات شاملة في الفريق بعد النتائج السيئة الفترة الماضية.

لأن بعد ما مشي فيريرا بعض اللاعبين مش عجبهم وكانوا عايزينه يستمر، لكن المستشار قالها صريحة اللى مش عاجبه يمشى، يا ترى إيه حكاية تسريح اللاعبين؟ وليه شيكابالا معترض؟ ومين اللي هيمشي؟ وإيه الصفقات الجديدة؟.. كل ده هتعرفوه معنا في التقرير التالي:.

بعد الأزمة الأخيرة لنادى الزمالك ورحيل كابتن فيريرا عن الفريق بناء على قرار المستشار مرتضى منصور، طلع عدد من اللاعبين اللى بيحبوا فيريرا ولمحوا بالكلام أنهم قريب قوي هيمشوا من النادى، بسبب أن النادى ماعدش مناسب ليهم.

وبكلامهم ده وتلميحهم كانوا فاكرين أن المستشار مرتضى منصور هيكش وممكن يرجع فيريرا تانى، بس اللى حصل كان العكس تماما، المستشار طلع وقال إن اللى مش عاجبه تصرفاتى في النادى يمشى، كل اللى عليه بس أنه يجيب عرض من أي نادى ويمشى.

وقال إن اللاعبين جوه النادى مش موظفين، ولا يعاملوا نفسهم موظفين، دول مهتم إسعاد الجماهير الزملكاوية اللى بالملايين في كل العالم، وأى لاعب هيسوق فيها أو يقل بمستواه هيتعاقب ماديا، يعنى يحرم من مرتبه أو ياخد خصم محترم.

المفاجأة بقى، ان مش لاعب واحد ولا حاجه اللى كان معترض على قرار مرتضى منصور، دول 3 لاعبين ومنهم أهم لاعب في الفريق حرفيا واللى كل الجماهير الزملكاوية بتحبه، كابتن شيكابالا، واللى طلع في كلمة من شويه وقال في حق فيريرا كلام زى الفل، كان ناقص يقول فيه شعر.

قال إنه لازم يشكر فيريرا على كل اللى عمله في نادى الزمالك، وأنه كان قيمة كبيرة قوى داخل النادى، وبصفته قائد الفريق، فهوا حابب يوجه ليه الشكر، وأن الكل عارف كل اللى عمله داخل النادى الموسم اللى فات على الرغم من الظروف السيئة اللى كانت تلاحق الفريق من كل مكان.

ومش بس شيكابالا لوحده اللى اتكلم كويس حق فيريرا، ده كمان كابتن محمود الونش، مدافع الزمالك، واللى زعل جدا عشان فيريرا، ونشر صورته على فيس بوك، وكتب عليها: بجد كان نفسى أسلم عليك قبل ماتمشى، شكرا يابروفيسور بجد، تعلمت منك كل الخير داخل الملعب وخارجه، ليك دوام الصحة يابروف”.

نيجى بقى للاعب اللى أصلا مرتضى منصور واقع معاه في مشكلة كبيرة، وقايل في حقه كلام مش حلو، كابتن أحمد فتوح، واللى بكل بساطة عمل إيه، غير صورته على إنستجرام لصورة فيريرا، وده بعد يا دوب ثوانى من رحيل فيريرا عن النادى.

ومعروف طبعا أن مرتضى كان غلط في حق أحمد فتوح وقال عليه أنه بيشرب ممنوعات، هوا ولاعب كمان في الفريق، وده اللى مأثر على فتوح في كل الماتشات اللى فاتت، وكان لمح من فتره انه عايز يمشي ويروح النادى الأهلى.
ماتريل:

الكلام الكتير دلوقتي عن أن فيه عملية تسريح هتحصل جوه الفريق وفي للاعبين كتير هتمشي خاصة اللاعبين اللي معروفش يثبتوا نفسهم.. والأغلب هتكون إعارات زي عبدالله جمعة ومصطفى شلبي وغيرهم من اللاعبين الشباب كمان.

وعشان يرضى الجماهير وماتقلبش عليه، خلص المستشار مرتضى منصور أول الصفقات الشتوية للنادى، وهى انتقال ناصر منسي مهاجم البنك الأهلى لصفوف القلعة البيضاء في صفقة بيع نهائي… مش بس كده لكنه قال إن في صفقة مهاجمة تقيلة جدا وكمان في كلام على عبدالله السعيد.
تفتكروا الصفقة دى هاتبسط جماهير الزمالك وتنسيه رحيل فيريرا؟ .. اكتبوا في التعليقات.