عدد من الأعمال الفنية بدأ عرضها بالفعل، ولكن المسلسل الذي نستطيع أن نقول إنه عمل «بوم» بمجرد عرضه كان هو المداح أسطورة العشق، والذي قدر إن يكون هو مصدر الجدل على مواقع التواصل، وأيضا الجمهور بدأ ياخذ منه جمل وتعيش، والتي ستتحول مع الوقت لميمز وتعليقات على فيسبوك خلال الفترة الجاية.
بعد ساعات من عرض الحلقة الأولى من الموسم التالت لمسلسل «المداح» واللي عنوانه «أسطورة العشق»، ابتدى رواد مواقع التواصلا ياخدوا لقطات مصورة من الحلقات، وبعض العبارات والجمل اللي اتقالت وابتدوا يتداولوها بينهم.
المداح من بطولة النجم حمادة هلال، ومن إخراج أحمد سمير فرج، وتألف وليد أبو المجد وأمين جمال.
المداح من الأعمال الفنية اللي قدرت تحقق نجاح كبير من أول مواسم عرضه، ولكن التطور الكبير على مستوى التشويق والإثارة اللي قدر يحققه العمل، خلا الجمهور يستناه بشكل كبير، خصوصا إن انطلاقة المسلسل من الحلقة الأولى، كانت جاذبة جدا، للجمهور.
المداح السنة دي في رمضان 2023 بيتعرض منه الموسم التالت اللي عنوانه «أسطورة العشق»، ومن المعروف إن الأعمال المكونة من أكتر من جزء في أحيان كتير، مستواها بيضعف، أو صناعها بيوصلوا لمرحلة الإفلاس، وبتكون أكتر من نوع، منها اللي بتكون فكرة رئيسية تقدر تخلق منها حكايات، أو موضوع واحد ممتد، وعادة النوع الأخير ده هو اللي بيفشل فيه، لأن الحكايات بتتحول لهري عشان نملا الوقت.
لكن الجديد إن الموسم التالت من مسلسل المداح ومن بدايته كدة بيقول إننها قدام موسم ربما يكون أقوى من الموسمين اللي فاتوا، بسبب التشويق وطريقة السرد والحكاية اللي بدأ بيها من أول حلقة، ومحاولة استخدام بعض الجرافيكس، والحالة اللي قدر يخلقها عند الجمهور.
والمعروف إن فكرة مسلسل المداح الرئيسية هي إن صابر المداح، اللي بيلعب دوره الفنان حمادة هلال، بيحارب الجن وبينتصر عليهم، ودي نفس فكرة الموسم التالت.
الحلقة الأولى بتفتح على مولد، في محافظة قنا، وحمادة هلال بينشد على المسرح، وبعدها بيقابل حد من كبار البلد الحاج سليم واللي بيعلب دوره الفنان أحمد ماهر، عشان يقوله عايزينك في مشوار فيه خير لبنت لو محلقتهاش رقبتها هتطير.
ومن هنا بتبدأ الأحداث وبيروح صابر عشان يشوف البنت وبتدأ الحكاية من هنا وتحصل شوية أحداث مثيرة وفي نهاية الحلقة بيحصل المشهد المميزة بتاع ميلاد ابن صابر المداح، وظهور مجموعة من الجن ماشيين بيرددوا «ابننا جه.. ابننا جه».
ولو شوفنا البوستر بتاع المسلسل بيظهر صابر المداح شايل طفل في إيده، وحواليه مكان كله خراب ودمار، واللي نفهمه من كدة، إن الخناقة هتكون على الطفل ده، إن الجن عايز ياخد الطفل، وصابر بيحاول يحميه منهم.
بس ليه الطفل ده تحديدا؟ ده غالبا مع الحلقات يظهر إنه بيرجع لقصص وحكايات شعبية بتتكلم عن «الطفل الزهري» وده طفل المفروض عده ملكات وقدرات خاصة وروحانيات عالية، واللي هيربيه هيقدر يستفيد منه كتير.
