تحدثت أنجلينا فارس صديقة الفتاة الأجنبية من أصل مصري، التي حررت محضرًا ضد الفنان محمود حجازي بتهمة التعدي عليها جنسيًا داخل أحد الفنادق، تفاصيل جديدة بشأن الواقعة وعلاقة صديقتها بالمتهم.
واقعة محمود حجازي والفتاة الأجنبية
وقالت: البنت المسكينة دي حكتلي اللي حصل من الفنان محمود حجازي، وإنه تعدى عليها، وقالتلي إنها لما رجعت بلدها من مصر كانت حالتها النفسية سيئة جدًا، وكانت عايشة تحت التهديد والخوف من ساعة ما حصل اللي حصل، وحكتلي إنه غير تعديه عليها هو قال لها إنه مسيطر في مصر، وإن علاقاته ممكن تطلّعه من أي حاجة، وإنها لو حكت عن اللي حصل ممكن تتفضح، وكمان هيتواصل مع أهلها.
وتابعت: هو كان بيكلمها كتير وبيحكيلها عن اللي كان بيحصل مع زوجته، حتى يوم واقعة الضرب هو كان على اتصال معاها، وكانت على الاتصال معاه وسمعت اللي حصل، وبعد كدة كلمها وقالها: آه، أنا اديت مراتي علقة موت، وأنا مسيطر هنا.
وأضافت أنجلينا فارس: ولما البنت سألته ليه عمل كدة في مراته؟، قال لها إنه افتكر إن زوجته سفّرت ابنهم لأمريكا، وهي كانت في السعودية بتعمل عمرة، وهو كان ناوي يستعمل منع السفر كورقة ضدها عشان تتنازل عن حقوقها، لأنه كان مفهمها إنها ما تستاهلش أي حاجة، والبنت صدقته لغاية ما هي كمان اتأذّت منه وعرفت إنه شخص مؤذي وبيصطاد بنات مصريات وأجنبيات على تيك توك، وهي اتأثرت لما سمعت قصة زوجته من السوشيال ميديا، وسمعت الحكايات اللي كانت عكس اللي قالهولها، وهي كمان كانت عايشة تحت التهدید.
واستكملت: أنا والبنت دي كنا على التيك توك مع بعض، ونعرف بعض من خلاله، وإحنا كنا من الناس اللي في الفريق بتاع محمود حجازي على تيك توك، وهو كان بيكلمها كتير، وعارف إنها كانت عايزة تفتح مشروع في مصر، وقال لها إنه هيساعدها بعلاقاته مع الفنانين، عشان هي كانت عايزة تفتح مشروع في الميكب ومستحضرات التجميل، فهي جت مصر بعد ما قال لها إنهم هيشتغلوا على المشروع دە مع بعض، وکانت متحمسة جدًا.
وأردفت: بعد ما حصل الموضوع، هي كلمتني وكانت منهارة وحالتها تعبانة جدًا، حتى حكت لواحدة كبيرة عنده في التيك توك، تعتبر شريكة في الأكاونت بتاعه، هي أصلًا مش مبينة وشها على التيك توك ولا حد شاف شكلها، بس برضو بتقعد ساعات طويلة، ولما البنت الضحية قالتلها اللي حصل، وعدتها إنها في ضهرها وهتجيب لها حقها، وبعد كدة اختفت، فلما حسيت إن حقها بيضيع، أنا شجعتها وقلت لها لازم تنزلي مصر وتعملي محضر، وإن حقك لازم يرجعلك، عشان ننقذ كمان ستات غيرك منه.
