تخيل ان نجمة الاغراء زمان هند رستم بجلالة قدرها ضحك عليها من رجل و رفض الاعتراف بابنته منها، وظلت تجري ورائه في المحاكم ٤ سنين لكي تثبت نسب بنتها بعد ما تخلى عنها وتركها.
حكايات كتيرة في حياة النجمة هند رستم واللي كنت تشوفها تقول دي معندهاش مشاكل وحياتها كلها تمثيل و رفاهية ودلع وفلوس لكن الحقيقة لأ هي عاشت فترة صعبة مع جوزها الاول اللي اضطرت بسببه تجري في المحاكم سنين طويلة .. تعالى احكيلك حكاية الراجل اللي كسر قلب هند رستم واتخلى عنها هي وبنتها
هند في بداية مشوارها كانت كومبارس وبتعمل ادوار صغيرة لكن من بداية الخمسينات اتعرفت على المخرج حسن رضا و من هنا بدأت تتشهر و تلمع و الكل يجري وراها
طبعا عجبت المخرج حسن رضا و قرر يتجاوزها وفعلا اتجوزوا ٣ سنين في السر لكن هو كان عنده اسرة و اولاد ، ولما عرف ان هند رستم حامل قرر يسيبها و ينفصلوا ده كمان طلب منها تعمل اجهاض و تنزل الجنين لانه مكنش عايز ولاد تاني ، لكن هند اصوت انها تكمل حملها لانها كانت مبسوطة بالطفل و عايز تبقى ام و مرضيتش تعمل العملية
بس للاسف ده عملها مشاكل كتير لان جوزها حسن رضا رفض يعترف بالبنت و قالها ان دي مش بنتي ، وهند مكنش قدامها غير المحاكم و رفعت عليه قضية نسب عشان تثبت ان هو ابو البنت فعلا ، وقعدت ٤ سنين تحري في المحاكم بسبب القضية دي
وفي جلسة من الجلسات هند رستم مقدرتش تمسك نفسها وعيطت قدام القاضي من كتر ما طليقها حسن انكر جوازه منها و انه ابو البنت ، وبعد فترة المحكمة اتأكدت من النسب فعلا و اتحسمت القضية بإثبات النسب و اتجوزت حسن رضا تاني بشكل رسمي لمدة صغيرة عشان اجراءات النسب و القضية وبعد كدا انفصلوا.
هند رستم خدت بنتها الوحيدة بسنت و بعدت عن باباها بعد معركة طويلة في المحاكم ، وكملت في مشوارها الفني و كانت بتحاول توفر لبنتها كل حاجة هي محتاجالها وقامت بدور الاب و الام سنين طويلة.
وبعد كام سنة ، هند رستم كان عندها هاجس كدا انها مريضة كانسر زي مامتها ، و من كتر ما كانت بتفكر في الموضوع ، بدأت تروح لدكتور نسا اسمه محمد فياض عشان تطمن على نفسها و كل فترة تروح تعمل اشعات وتحاليل عشان لو عندها حاجة تقدر تعرف بدري ، لانها خافت يكون الموضوع وراثة و يحصلها زي والدتها.
الموضوع قلب من زيارة طبيب لقصة حب ، واتعلقت هند رستم بالدكتور بتاعها وحبوا بعض و قرروا يتجوزوا وكان سنها ٤١ سنة وقتها ، وفعلا اتجوزته و كملت معاه حياتها لحد ما اتوفت.
الدكتور محمد فياض مرفضش شغل هند رستم رغم انها وقتها مانت ملقبة بنجمة الاغراء و مارلين مونرو الشرق وكل الرجالة كانت بتحبها و نجوم كتير جريوا وراها ، لكن هو سابها تكمل في مشوارها الفني مع بعض التحفظات
وفعلا هند رستم من بعد جوازها من الدكتور وهي بقت تختار ادوارها كويس و تبعد عن اي مشهد ممكن يسبب لجوزها حرج ، وده كان واضح جدا في افلام هند رستم في الستينات والسبعينات ، وبدأت تبعد عن مشاهد الاغراء بتاعت زمان اللي كانت سبب في شهرتها رغم انها مش بتحب لقب ملكة الاغراء ده وكانت يتضايق منه جدا
وفجأة سنة ٧٩ قررت هند رستم تعتزل بكامل ارادتها ومن غير ما جوزها يدخل ولا طلب كدا ، لكن هي حست انها قدمت كل حاجة خلاص ومحتاجة تستقر وتتفرغ لبيتها و بنتها بسنت وفعلا اعتزلت هند رستم ومرجعتش للتمثيل ابدا تاني وكان اخر فيلم قدمته هو حياتي عذاب
و مع مرور السنين كبر الدكتور محمد فياض وبقى من اشهر و اهم دكاترة النساء في الوطن العربي ، وكان واضح ان هند رستم وشها حلو عليه ، وفضلت عايشة معاه لحد ما اتوفى الدكتور سنة ٢٠٠٩ ، وبعد سنتين اتوفت هند رستم سنة ٢٠١١ بسبب ازمة قلبية
اما بقى بسنت بنت هند رستم فهي اتجوزت وخلفت ابنها الوحيد محمد لكنها انفصلت من سنين طويلة من قبل وفاة والدتها وكانت عايشة معاها في نفس البيت ، وبسنت فصلت محتفظة بكل فساتين و مقتنيات والدتها هند رستم ولما نقلت وعاشت في فيلتها بالشيخ زايد خدت معاها كل حاجة تخص مامتها.
