ترافيس سكوت سمعته ليست على ما يرام ولذلك فإنه تسبب في حالة قلق على السوشيال ميديا بسبب حفلته في مصر..و الناس في حالة استغراب بعد ما عرفوا إن الحفلة ستقام في الأهرامات وفي معاها وغصب عن أي حد.
مطرب الراب قرر يتحدى الكل ولا فارق معاه نقابة للموسيقيين ولا اعتراضات.. إزاي ترافيس سكوت هيعمل الحفلة رغم الخوف والتحذيرات اللي عمالة تتقال وليه محدش قادر يلغيها؟ وإزاي هيعمل الطقوس الغريبة بتاعته؟.. كل ده وأكتر هنعرفه مع بعض في التقرير التالي:
تقريباً كده حفلة ترافيس سكوت هتبقى أقوى حفلة في مصر أصل الرأي العام في حتة تانية خالص ورغم اللي بيتقال عن سكوت واللي بيحصل في الحفلات بتاعته من طقوس وحاجات غريبة محدش شافها في حفلة هنا قبل كده مخلية الكل خايف وبيقول انتوا إزاي هتعملوا فينا كده.. وليه جايبين مغني زي ده في مصر أصلا وحكايات كتير.. بس ترافيس هو اللي كعبه عالي وهيفرض نفسه بالعافية.
مصير الحفلة
حفلة ترافيس سكوت خلاص هتتعمل يوم 28 يوليو والشركة اللي هتنظم الحفلة هي اللي قالت على وضعنا وجامدين ومفيش إلا إحنا والحفلة في معادها.. أصل كل التذاكر اتباعت والدعاية والتجهيزات وكل حاجة تمام ليه تتلغي الحفلة؟ حاجة مش منطقية خالص.. طبعاً الشركة عايشة حالة فصلان عن الواقع واللي بيتقال على ترافيس سكوت ومكملة في طريقها ومش فارق معاها بيان نقابة الموسيقيين في مصر واللي قالت مفيش حفلة هتتعمل طالما الناس معترضة.. وهنا تقدروا تقولوا كده إن اللي حصل ده دعاية مجانية للحفلة.
السمعة مش ولابد
هو ليه الناس خايفة كده؟ ده السؤال اللي بيطرح نفسه بين الناس وكل ده عشان مغني الراب ترافيس سكوت سمعته مش ولابد والحفلات اللي عملها بره وفي كذا مهرجان كان فيها جدل واترفع قضايا قانونية بسبب إن مفيش أمان في حفلاته الموسيقية.. أصله معروف إنه بيعمل طقوس غريبة وبيحصل هيجان في الحفلات بتاعته والناس بتجري على المسرح ومش فارق معاهم الزحمة.. تخيلوا في حفلة ليه راح فيها 10 أشخاص مرة واحدة ومحدش عرف ينقذ حياتهم.. بس الخوف كله عندنا هنا مش الطقوس اللي بيمارسها سكوت في حفلاته.
ولا فارقة معايا الناس
زي ما تقول كده الشركة اللي بتنظم الحفلة قالت ولا فارقة معايا الناس ومش هرضي حد على حساب المصلحة.. وكل المخاوف دي ولا ليها لازمة عندها.. ده كمان في مشاهير اعترضوا على بيان النقابة وقالوا ده بيضرب السياحة عندنا وليه من الأول محدش خد باله زي الفنان عمرو سعد اللي هاجم النقابة ورجل الأعمال نجيب ساويرس وكمان الإعلامية لميس الحديدي وغيرهم قالوا إن اللي عملته النقابة ميصحش وده طبعاً خلى الشركة تكمل في طريقها للحفل.. ومحدش هيقدر يمنعه.
طقوس غريبة
حفل ترافيس سكوت اتباعت كل تذاكره على فئتين الأولى برميوم وقيمتها 4 آلاف جنيه والثانية VIP Golden Circle وسعرها 6500 جنيه.. وشكل في ناس عاوزة تشوف الطقوس الغريبة بتاعة سكوت وعشان كده دفعوا الأسعار دي الحفلة ومحدش اعترض وربنا يستر بس ومنلاقيش ضحايا وناس حياتها بتنتهي في حفل زي ده.. لحد هنا الفيديو اللي معايا خلص شاركونا بآرائكم في الكومنتات وقولولنا انتوا مع ولا ضد الحفلة دي ومتوقعين يحصل فيها حاجة لو اتعملت ومن هنا لحد معادها ممكن يحصل جديد والنقابة تلغي الحفلة بجد ولا ترافيس سكوت هيفضل كعبه عالي؟.
