محمد رمضان يستفز الناس بفلوسه الكثيره، راجع من امريكا ومعه الآلاف الدولارات، يضعهم بجواره على الكرسي في طائرته الخاصة دون أن يظهر أي اهتمام.
الفلوس دى بجد ولا مزورة ؟ .. وليه رمضان حاططها جنبه كده ؟ .. كل ده وأكتر هنعرفه مع في التقرير التالي:
النص: من شويه كده انتشرت صور للفنان محمد رمضان غريبه قوي، هي اه مش غريبه على رمضان، بس غريبه على الناس في الوقت ده، رمضان متصور في طائرته الخاصة وجنب منه رزم دولارات بالالاف، عددهم كبير جدا، بالتقريب كده لو حولناهم لمصري يعملوا ملايين الملايين، وانت وراحتك بقى شوف يعملوا كام.
فيه ناس أول ماشافت الصور دى قالت ده رمضان قاصد يغيظ الناس بالفلوس الكتير، وفيه ناس تانيه كان ليها رأي تانى في اللي عمله محمد رمضان وأنه بيحب المنظره والشو، وهو نشر الصور دي قاصد يتمنظر على الجمهور بتاعه والفنانين زمايله اللى وضعهم المالى على قدهم.
وفيه تعليقات كتير اتكتب لمحمد رمضان على صور الدولارات اللى نشرها على صفحته، أغلب التعليقات كانت لناس استفزتها الصور اللى نشرها محمد رمضان، منهم اللى قاله بطل منظره يا رمضان وخف شويه فيه ناس مش لاقيه الجنيه دلوقتي، وفيه اللى شاف ان محمد رمضان ليه الحق انه يعمل اللى هو عايزه، ينشر صور فلوس أو ينشر صوره طائرته الخاصة، يعمل اللى يعمله مافيش حد ليه حاجة عنده، وهو أصلا معروف أنه بينشر صور وفيديوهات زي دي كتير على صفحاته على السوشيال ميديا وهو بنفسه وضح قبل كده بيعمل كده ليه.
وعلى حسب كلام محمد رمضان فهو بيحب ينشر صور عربياته وفلوسه وكل العز اللى هوا فيه عشان بيحب جمهوره، أيوه رمضان متصور أن نشره للصور والحاجات دي أنه كده بيحب جمهوره وبيشاركهم معاه فرحته بالعز اللى هوا فيه، هو قال كده قبل كده في تصريح تلفزيوني ليه، ووقتها بردوا الناس استغربت شايفين انه برده يقصد يستفز الناس.
الفكرة دلوقتي أن بعد كل الشهرة اللى عملها محمد رمضان دي والفلوس الكتيره كتبت له ناس على الفيس بوك انه يخاف من الحسد ويبطل ينشر صور زي كده تاني خالص، يعنى يوقف خالص نشر صور عربياته الكتير وفلوسه الكتير، وكل ده قال ايه بحجة الحسد.
بزمتكم محمد رمضان ممكن يعاني من الحسد زي ما الناس بتحذره، يعنى ممكن رمضان فى مره من المرات حاله يتغير خالص ومايبقاش معاه فلوس بسبب ان حد حسده، ابقوا اكتبوا رأيكم على موضوع الحسد ده في التعليقات.
لحد هنا ونكون وصلنا لنهاية الفيديو وحكينا ليكم قصه الدولارات الكتير اللى ظهرت مع محمد رمضان من شويه، وقبل مانقفل الفيديو حابين نعرف رأيكم فى الحركات اللي بيعملها رمضان ونشره كل يوم والتاني صور لعربياته وفلوسه الكتير.. هل هو قاصد يستفز الناس ولا ايه قصده بالظبط؟ اكتبوا رأيكم في التعليقات.
