زينة تلمح للصلح مع أحمد عز..راجل محترم

لو فاكر إنك سمعت العجب، فانت ستمسع الأن أغرب تصريح من الفنانة زينة عن أحمد عز بعد خلاف كبير وصل للمحكمة فما القصة.

قصة الفنانة زينة والفنان أحمد عز مبتخلصش.. حاجة كده زي المسلسلات الأجنبي اللي بيتعرض منها ألف حلقة وحلقة.. وبرضه أحداثها مكملة معانا لسنين وسنين.. بس اللي مكنش حد يتخيله أبدا.. هو إنهم يقتنعوا بمقولة الصلح خير.. قوم نتصالح

زينة بعد سنين من المحاكم والقضايا.. والأحكام والفلوس اللي بتسحبها بالملايين من أحمد عز عشان تصرف على توأمها وتدخلهم مدارس بأرقام مهولة.. راجعة النهارده تقول عنه ده أبو ولادي ومتكفل بيهم

وعلى طريقة أيوه يا برايز الوضع اتغير خالص.. قالت زينة إن المشكلة اللي بينها وبين أحمد عز شخصية جدا.. ولولا إن الإعلام والناس اتدخلوا فيها كان زمانها اتحلت من زمان
بس هي دي ضريبة الشهرة.. – لو فاكرين إنكوا سمعتوا كلام غريب فا اللي جاي أغرب-.. زينة مش بس بتلمح إن مشكلتها مع أحمد عز قربت تتحل.. لا دي كمان بتقول محدش يتدخل بيننا وبس اخرسوا بقى … كفاية.. انتوا مين.. واحد وأم عياله عاوزين مننا ايه “وبتشخط أوي كده”
طب كل ده وهنعديه عادي.. اللي مش هنقدر نعديه أكتر ثقتها وهي بتقول.. احنا اللي داخل بينا خارج.. والسنين هتلف ولو وقعت في أزمة هيجي يلحقني عشان ولاده.. انتوا متخيلين؟ ..

طب خدوا دي.. زينة قالت عن أحمد عز إنه راجل كويس ومحترم ومتكفل بأولاده.. ومن الآخر كده يعني .. أبو ولادي وبحبه.. ومش هينفع أقول بحب راجل غيره.. ولادي عايشين من غير أبوهم رغم إنه موجود على وش الدنيا.. فا يعني لو سمحتوا محدش له دعوة بينا.. هو راجل محترم وأنا ست محترمة

والله العظيم أنا عارفه إنكوا فاكرين الكلام ده طالع من برنامج الكاميرا الخفية.. معلش معلش .. هي كده الحقيقة ساعات بتجرح بس أريح.. والحقيقة اللي حاصلة دلوقتي إن زينة غيرت كلامها خالص.. ومش بعيد تسحب القضايا اللي رفعاها ضد أحمد عز في مقابل الصلح مع ولاده

حاجات كتير كانت بتقول إننا ممكن نوصل للحظة دي في يوم من الأيام.. لما قالت قبل كده إنها رافضة الزواج تاني.. وإن ولادها بيغيروا عليها ومش عاوزين راجل غريب يدخل حياتها.. مستنيين أبوهم تقريبا

وإنها رغم مرور فترة طويلة على قصتها مع أحمد عز.. إلا إنها مطلعش حد مرة وقال إنها ارتبطت بحد أو في شخص غيره في حياتها.. ناقص تغنيله زي أصالة “أحلف بإيه من بعده عايشة عاللي فات”

صادقة يا زينة يا حبيبتي صادقة.. والصلح خير طبعا.. ومتنسوش تعزمونا بقى عالفرح المرة دي 😀