أعمال ومسلسلات موسم رمضان مازالت مستمرة معنا، والجمهور بتابع الأحداث وكل واحد قرر أي عمل سيشاهده وأصبح متعلق بشخصيات العمل.
وبنلاقي طول اليوم الكتير من الأعمال بيتم انتقادها، وأعمال تاني بيتم الإشادة بيها، ولكن الأكيد والأهم من أي حاجة، إن موسم رمضان السنادي مليان أعمال مميزة لنجوم ومخرجين كتير، والجمهور بقى هو الحكم في النهاية.. ولكن حصل تشابه بين عدد من المسلسلات في يوم 10 رمضان لأننا فقدنا عدد من الأبطال في المسلسلات دي..
الأعمال الخاصة بموسم رمضان اتعرض منها جزء كبير، واتضحت الصورة والحكايات اتعرفت والنجوم وصصهم بقت حاجة معروفة، وكمان الجمهور اتعلق بكتير منهم، أو مكنش طايق شوية كمان للدرجة اللي كان عايز دورهم ينتهي على كدة من كتر ما كان وجودهم على الشاشة بيستفزه.
المفارقة اللي حصلت إنه في حلقة يوم 10 رمضان من عدد من المسلسلات ، لقينا إن في عدد من الأبطال ماتوا سواء بشكل طبيعي بقى أو جريمة، ولكن الفكرة إنهم كلهم في نفس الحلقة.
يعني مثلا مسلسل المداح في حلقة 10 رمضان واللي هي الحلقة رقم 11 انتهت حياة والدة الشيخ صابر، واللي كانت بتلعب دورها الفنانة عفاف رشاد، وده بعد تعرضها لطعنات من بنتها في المسلسل، شخصية هبة، اللي كانت تحت سيطرة الجن، في الوقت اللي كانت رايحة فيه بيت أبوهم اللي قاعد فيه بطل العمل صابر واللي بيلعب دوره حمادة هلال، وكانت فاكرة إن هو اللي نايم في السرير فسددت ليه شوية طعنات، ولكن في الآخر ظهر إن اللي في السرير هي أمهم مش الشيخ صابر نفسه.
كمان مسلسل «ضرب نار» اللي بيلعب بطولته الفنان أحمد العوضي والفنانة ياسمين عبدالعزيز، شهد هو كمان حالة وفاة في حلقة 10 رمضان، وده بعد موت أمه في العمل واللي بتلعب دورها الفنانة سهير المرشدي، وظهر العوضي في مشهد أثار الجمهور وحسسهم بحزن كبير وهو بينعى والدته.
في حلقة 10 رمضان كمان من مسلسل الأجهر، انتهى دور الفنان سيد رجب، وده بعد ما عرف إن ابنه اللي بيلعب دوره الفنان أحمد صفوت، حطله سم في الأمل عشان يموته، وبالفعل سيد رجب عرف، وراح وقتها لعمرو سعيد اللي بيلعب دور الأجهر بطل العمل، وقاله على اللي حصل وطلب منه إنه يقتله عشان ميبقاش مات على إيد ابنه، ولكم الأجهر رفض، وحصلت مشاجرة بينهم فخرجت طلقة بالغلط وسكنت جسم سيد رجب عشان تنهي حياته وبنضم لقيامة وفيات 10 رمضان.
الفنان أحمد صفوت بقى بعد المؤامرة اللي عملها على أبوه في مسلسل الأجهر، المخرج خالد يوسف ردهاله في مسلسل «سره الباتع»، بعد ما استشهد الضابط نديم اللي هو بيلعب دوره في المسلسل، في هجوم لجماعة.
وبكدة يكون دور 4 شخصيات انتهى في حلقات 10 رمضان في عدد من المسلسلات المعروضة على الشاشة.
