إن كنت تبحث لى فرصة عملت وسئمت من البحث دون جدوى فنحن نحمل لك البشرى وهذا لأن الجهات الحكومية أعلنت خلال الساعات الأخيرة عن حاجتها لتعيين موظفين جداد.
لكن إيه تفاصيل الوظايف دي؟ ومين الجهة اللي أعلنت عنها؟ وايه الأوراق والشروط المطلوبة؟ واختيار الموظفين بيتم بناءا على ايه؟
من وقت للتاني الجهات الحكومية بتعلن عن وظايف خالية في مختلف القطاعات وده عشان تسد اي عجز موجود في الجهات دي، عشان كده كتير من الناس اللي بتدور على شغل بيستنوا الاعلان عن الوظايف دي بفارغ الصبر.
بس خلاص متدورش ولا تستنى كتير وده لأن المديريات التعليمية أعلنت عن فتح باب التقدم للعمل للعام الدراسي الجديد، وده عشان تسد العجز الموجود في المدارس اللي عندها نقص في المدرسين، لكن ياترى ايه التفاصيل؟
شوف يا سيدي، حسب جريدة الأهرام المديريات التعليمية أعلنت عن حاجتهم لمدرسين يشتغلوا بالحصة، واعلنت كمان عن شروط الوظايف دي اللي أولها ان يكون خريج كليات عام وأزهر.
وأولوية الاختيار هتكون للأعلى تقدير بداية من امتياز لغاية جيد جدا، وبعد كده لجيد ثم لمقبول ويكون الترتيب بالنسبة المئوية، وبرضو هيكون للأعلى مؤهل زي أنه يكون معاه ماجستير او الدكتوراه.
كمان قالت إن الأولوية هتكون بمدة الخبرة اللي قضاها المرشح بالتعاقد مع المديرية لشغل وظايف التدريس، ده بالإضافة لأقديمة التخرج والأكبر سنت.
وبالنسبة بقى للاوراق المطلوبة فأول حاجة بتقدمها هي طلب باسم مدير عام الإدارة التعليمية، وأصل شهادة المؤهل الدراسي للاطلاع و4 صور منها.
انت كمان بتقدم اي حاجة بتفيد بأن عندك خبرة سابقة في أعمال التدريس، وبتقدم كمان 4 صور لبطاقة الرقم القومي تكون سارية، من ضمن الاوراق اللي بتقدمها كمان شهادة الخدمة العسكرية للذكور وشهادة الخدمة العامة للإناث و4 صور شهادة الميلاد.
وبتقدم إقرار بعدم المطالبة في المستقبل بالتعيين أو التعاقد على الموازنة العامة للدولة، وكل الورق بتقدمه مع بعض في ملف واحد.
وبمناسبة وظايف المدرسين، حسب تصريحات الدكتور رضا حجازى وزير التربية والتعليم والتعليم الفنى، أنه جاري العمل على ضوابط تعيين وتسكين المعلمين الجداد الناجحين فى مسابقة “30 ألف معلم” اللى أوشكت أنها تخلص.
وقال إنه هيتم تسكين المدرسين من بداية من العام الدراسى الجديد، وقال كمان أنه بيتم سد عجز المعلمين من خلال التعاون مع وزارة التضامن الاجتماعى من خلال خريجى الجامعات اللي بيؤدواالخدمة العامة، بالإضافة لتعيين معلمين بالحصة وفقا للضوابط المحددة.
وعلى فكرة حركة التعيينات الجديدة اللي أعلن عنها وزير المالية خلال شهر مايو اللي فات لتعيين 70 الف خريج هيكون بينهم 30 الف معلم ومن المتوقع أن جوابات التعيين توصلهم قريب جدا والتعيين يكون في شهر يناير اللي جاي، وده حسب مصدر مطلع لجريدة الوطن.
انت كمان لازم تعرف إن وزارة التربية والتعليم والتعليم الفنى كانت سبق واعلنت عن الخريطة الزمنية للعام الدراسي الجديد، اللي من المفترض أنه يبدأ يوم السبت الموافق 30 سبتمبر 2023، لحد السبت 8 يونيو 2024، لجميع المراحل التعليمية المختلفة للمدارس الحكومية، والرسمية، والرسمية للغات، والخاصة والخاصة لغات، وتبدأ أجازة نص السنة يوم 27 يناير 2024.
ودلوقتي قولنا هتقدم في وظايف وزارة التعليم ولا لا؟
