حل الفنان هشام ماجد، الساعات الماضية ضيفًا، ببرنامج “أسرار” مع الإعلامية أميرة بدر المذاع على قناة النهار.
وخلال اللقاء، كشف هشام ماجد عن سبب انفصاله فنيًا عن أحمد فهمي وشيكو، موضحًا أنه نشب العديد من الخلافات بينهم.
هشام ماجد يكشف مفاجأة عن سبب انفصاله عن شيكو وأحمد فهمي
وقال هشام: “احنا إصحاب من الجامعة، ولما جينا نعمل الرجل العناب فيلم، بعد ما عملناه مسلسل، اتفقنا أن أحمد فهمي هو اللي هيكتب هو وشريف نجيب بس، عشان ميحصلش مشاكل”.
وتابع: “لما فهمي كتب الفيلم، أنا وشيكو كان عندنا اعتراضات على الفيلم، وفهمي شاف أن ده عدم تقدير له، فـ قفشنا في الجزء ده، وقررنا أننا منعملش الفيلم سوا، وفهمي قرر أنه ينفصل ويشتغل لوحده.”
وأضاف: “كان بقالنا كتير بيحصل خناقات بس ومبتبانش للناس، وطول الوقت كان فيه اختلافات، ومفيش فرقة مبيحصلش فيها اختلافات، ومحدش بيكمل وقليل اللي بيكمل”.
وتابع: “أما حصل نفس الكلام، وبرضو بنتخانق أنا وشيكو بس مبتوصلش أننا ننفصل، وممكن نشتغل مع بعض إحنا التلاتة، بس منرجعش نبقى فرقة تاني، لأن خلاص كل واحد عمل شغل لوحده ونجح.”
وأكد : “أنا مش مغرور الحمد لله، ومتأكد جدًا إني مش مغرور، بس فيه ناس بتتغر وتتغير بعد الشهرة، والشهرة بتجنن، أنك تبقى محدش يعرفك وتعمل عمل يدغدغ الدنيا وتلاقي كل الناس بتتكلم عليك، أو يبقى مش معاك فلوس وتلاقي فجأة الناس بتعرض عليك فلوس كتير.. دي نقلة في الحياة تجننك.”
واختتم: “شُفت ناس بـ تتجنن من الشهرة عشان مش سوية، والخضة دي بتخليه يتجنن، ومبحترمهمش، عشان بين يوم وليلة ربنا إداله نعمة زيادة، فنسى الناس وأصحابه، ومحدش عمل معايا كده لأن محدش يقدر يتكبر عليا، ومش مشاهير بس فيه ناس عادية بتتغير”.
اقرأ ايضا:
