فن و مشاهير

ياسمين عز تتغزل في مرتضى منصور: طيب ومؤدب

أخيرا المذيعة ياسمين عز تحدثت عن المستشار مرتضى منصور، رئيس النادى الزمالك،ومن الظاهر أنها تحبه ومعجبة بشخصيته.

بس يا ترى إيه العلاقة بين ياسمين عز والمستشار مرتضى منصور؟ وليه بتدافع عنه وشايفة أنه من حق يجيب سيرة والدة أي حد يتعصب منه؟.. مفاجآت كتير هنعرفها في التقرير التالي:

ياسمين عز دخلت في سكة المستشار مرتضى منصور، رئيس نادى الزمالك، وقالت عنه كلام زى ما تكون بتحبه ومعجبة بيه، وكمان شايفه أن شخصيته أصلا أحلى شخصية في الرجاله كلها، حمش كده وقلبه كبير والاحلى من كده أنه بيضحكها جدا، وحاجات تانية كتير كملوا الفيديو للأخر وأنتم تعرفوها.

ياسمين عز شايفة أن المستشار مرتضى منصور عصبى شوية بس الأصل فيه هو الحنية كلها، ماهو من المنصورة بقى، والمنصورة كلهم حنيه ودلع ورومانسيين بس لو الست عرفت تتعامل معاه.

وعن لحظات الغضب اللى بتطلع من المستشار مرتضى منصور، ياسمين شايفة لأن دى حاجات عاديه خالص وفى الراجل الصح الجدع عادى أن يحصل كده خالص، مفيش مشكله المهم الست ماتعاندش وتقف قدام الراجل، لو الست كانت حنينه وعرفت تاخد الراجل براحه هيبقى فيه تفاهم بين الطرفين.

وعشان كده قالت إن المستشار مرتضى منصور من نفس العينة بتاعت الرجالة دى، لو الناس عرفت تتعامل معاه وتاخده بالراحة، الناس تقدر تاخد عنيه واللى هي عيزاه منه، وكله بالحب والحنية.

كل الكلام ده قالته ياسمين عز عن المستشار مرتضى منصور بعد الهجوم عليه من عدد كبير من الإعلاميين ولاعبين الكورة خلال الفترة اللى فاتت، ياسمين قالت كمان: أنا بحب مرتضى منصور لأنه بيضحكنى جدا جدا، وببقى مبسوطة وأنا بسمعه وبسمع كلامه، كلامه كله يضحك، حتى عصبيته بتضحك، بس خدوا بالكم منها ياجماعه، عشان خاطرى ماتعصبوش المستشار ولا تدخلوا معاه في خناقات.

ياسمين كملت وقالت: أنتم لو عصبتوه ودخلتم معاه في خناقات، غصب عنه هيجيب في سيرة الست الوالدة على طول، بس بدون قصد منه، هو بس فطرته كده معلش يا جماعة بقى أستحموله شويه، والأمور معاه هتبقى تمام، بس خدوا بالكم لو عصبتوه أكتر هاجيب في سيرة كل حبايبكم مش الست الوالده بس، على الرغم أنه والله بيحافظ على الصلاة وكمان في وقتها ومابيسبش فرض حرفيا، فا اكيد اكيد هو مايقصدش بقى كل الشتايم اللى بيقولها دى، مش معقولة يكون مبيسبش فرض ويقصد يشتم كده.

وفى نفس الوقت وجهت رسالة للمستشار مرتضى منصور، وقالت له: ياسيادة المستشار أرجوك أرجوك هدى نفسك شوية وبلاش شتيمة أنت محامى كبير وليك مكانك ومركزك وكمان رئيس لنادى الزمالك يعنى من أكبر الأندية في مصر وأفريقيا كلها، وكل جماهير الزمالك بتحبك والله وبتمشى وراء كلامك.

وقالت كمان: بلاش تعصب في الرياضة نادى الزمالك كبير بأرقامه، صح ولا ايه، اظن ألزملكاوية كلهم دلوقتي مبسوطين بيك.

ياسمين عز شايفة برضو أن المستشار مرتضى منصور مثال على الراجل الشرقى الأصيل اللى بيغير على بيته وبيحبه، وأن لو الناس اتعاملت معاه بحب بالمسايسة هتاخد عينه حرفيا، ويبقى معاهم دلع الدلع، وكمان شايفه ان كل لقطات التعصب اللى بتطلع من المستشار دى السبب فيها الناس اللى بتعصبه مش هو.

الغريبة بقى أن ياسمين عز تربطها علاقة بالمستشار مرتضى منصور وكانت من الناس اللي بتأيده دايما.. لكن محدش عارف إيه السبب.

أنتم بقى قولولنا إيه رأيكم في كلام ياسمين عز عن المستشار مرتضى منصور، هل هي صادقة فعلا في وصف المستشار وهوا طيب وحنين زى مابتقول ؟ ولا هي شايفة غلط؟ .. ياريت كل واحد فيكم يكتب رأيه في التعليقات بصراحة، خصوصا بقى الزملكاوية.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى