دافعت الفنانة دنيا سامي، عن الفنان مصطفى غريب، بعد الهجوم الذي تلقاه عقب حلقتها مع الإعلامية إسعاد يونس، في برنامج صاحبة السعادة، موضحة أن تصريحاتها عنه كانت على سبيل المزاح.
وكتبت دنيا سامي، عبر حسابها بموقع فيسبوك: بالنسبة للبوستات المنتشرة اللي مشير حلقتي مع أستاذة إسعاد يونس اللي أنا بقول فيها أن مصطفى غريب بيتريق عليا وبيقول عليا وحشة، وده طبعًا جاب لمصطفى الكلام والشتيمة.. أولًا شكرًا على دفاعكوا عني بس أنا أصلًا مش زعلانة من حاجة وأنا ومصطفى صحاب ودفعة واحدة وإحنا الاتنين اتمرمطنا زي بعض، وأنا كنت بحكي ده بهزار لأني عارفه أني قمر.
وتابعت دنيا سامي: مصطفى غريب ده أقرب وأجدع وأطيب بني آدم في حياتي، وحياة كل صحابه ولو قعدت اتكلم عليه من هنا لـ 100 سنة مش هيكفي والله قد إيه هو ضهري في الحياة.. واللي أنا قولته في البرنامج على اللي مصطفى بيقوله عليا ده هزار بين أي صحاب في أي شلة.
وواصلت: أنا الحمد لله معنديش عقد ومش حتى عندي عقد ومش عارفة ومش عندى عقد هتظهر بعد كده.. هو بجد مفيش حاجة وأصلًا لو كملتوا باقي الحلقة مع أستاذة إسعاد هتعرفوا إننا مسكناه تريقة وتقطيع أكتر من اللي هو بيهزر فيه معايا بكتير، ولو سمحتوا محدش في الدنيا يشتم مصطفى غريب غيري.
