الوسط الكروى أصبح ملئ بالخلافات والأزمات، هذا غير العقوبات والغرامات، أخطأت عقوبتك ستكون إستبعاد أو غرامة وممكن ترحل عن النادى.
وده شوفناه كتير الأيام اللى فاتت على مستوى كل الأندية ،وأخرهم أزمة عبد الله السعيد لاعب وسط نادي بيراميدز مع إدارة النادى ياترى إيه كواليس الأزمة دى؟وإيه سبب خلافه مع مصطفى فتحى؟وإيه السبب ورا إستبعاده عن اللقاء مع الزمالك؟
يلا نعرف أصل الحكاية إيه؟
إنتشرت الأخبار فى الساعات اللى فاتت عن إستبعاد عبد الله السعيد من قائمة نادى بيراميدز لمباراة الزمالك الى هتكون النهاردة الساعة 7 باستاد القاهرة الدولي ضمن مؤجلات الجولة الثالثة من بطولة الدوري الممتاز.
والكل بيسأل عن السبب،ياترى ليه تم إستبعاد عبد الله السعيد من المباراة؟
الحقيقة كلنا تابعنا فى مبارة المقاولون العرب لما عبدالله السعيد زعل بعد ما اليوناني تاكيس جونياس المدير الفني لبيراميدز استبدله بين الشوطين فى المباراة وخرج غضبان جدا ومشي وساب ملعب الدفاع الجوي قبل ما الماتش يخلص.
والبعض قال أكيد إستبعاده هيكون لأسباب تأديبية خاصة بعد غياب اللاعب عن التدريبات خلال الأيام اللى فاتت،لا وكمان محاضرش الإجتماع علشان يصفوا الجو ويحلوا الأزمة بينه وبين تاكيس وزميله مصطفى فتحى وكأن السعيد بيرد على اللى حصل فى مباراة المقاولون .
هل ممكن يكون لمصطفى فتحى دور فى إستبعاده؟
الحقيقة زى ما كلنا عارفين خلافه وخناقته مع زميله مصطفى فتحى داخل غرفة خلع الملابس لما مصطفى فتحي مقبلش أى تعليمات من عبد الله السعيد له خلال الشوط الأول من المباراة وإحتد الكلام بينهم،وده خلى قائد الفريق تاكيس يهاجم السعيد ويقرر إستبعاده.
عقوبة السعيد مش هتكون مجرد إستبعاد عن المباراة بس، لكن كمان هيدفع غرامة ربع مليون جنيه ومهدد كمان بالرحيل عن النادى.
وده اللى أكده شوبير لما قال إن تاكيس قرر استبعاد عبدالله السعيد من قائمة مباراة الزمالك، وعبدالله السعيد لوح بورقة الرحيل في حين هناك تأكيدات من بيراميدز بتقول إن تاكيس عايز يعمل سياسة التدوير بين اللاعبين في الفريق خاصة مع تقدم السعيد في السن، علشان كده هيتم إستبعاده من لقاء الزمالك .
شوبير قال كمان إن إدارة بيراميدز عندها لوائح ونظم ووضعت كمان نظام من فترة بيُلزم أي لاعب بالبقاء مع الفريق لنهاية المباراة، وطبعا السعيد خالف النظام ده فقررت إدارة النادى تعاقبه.
الحقيقة إن مش دى الأزمة الوحيدة اللى عبد الله السعيد بيواجهها الفترة دى ،عبد الله السعيد مش ملاحق على الأزمات ، منقدرش ننسى أزمته مع النادى الأهلى اللى أخر التطورات فيها إن المحكمة الرياضية”كاس”قررت النظر في قضية عبدالله السعيد مع الأهلي، والنطق بالحكم فيها نهاية الشهر ده.
وكمان اللاعب قدم شكوى ضد قرار تغريمه 2 مليون جنيه والحجز علي ممتلكاته لصالح النادي الأهلي فريقه السابق، واللى صدر من مركز التسوية والتحكيم الرياضي.
شاركونا برأيكم فى التعليقات،هل عبد الله السعيد بتصرفه الأخير ده يستحق فعلا العقوبة دى؟ولا كان ممكن يكون فى حلول تانية؟ خاصة إن غيابه عن المباراة هيكون مؤثر جدا فى مواجهة الزمالك؟ وهل تعتقدوا إن السعيد فعلا ممكن يرحل عن بيراميدز،ولا مجرد تهديد للنادى مش أكتر؟ وهل ممكن يدفع الربع مليون جنية الغرامة؟ ولا مصيره هيكون إيه؟ هنعرف كل التفاصيل دى الأيام الجاية.
