فن و مشاهير

فيديوهات مسربة تكشف سقطات شيرين عبد الوهاب وتفتح عليها نيران السوشيال ميديا

مفيش حد يقدر ينكر إن الفنانة شيرين عبد الوهاب واحدة من الأصوات المميزة في الغناء المصري والعربي خلال العشرين سنة الأخيرة، لكن على قدر تميزها على قدر ما كانت أكثرهم اثارة للجدل بسبب تصريحاتها ومواقفها الأخيرة والتي كانت سبب في انها تخسر كثير من جماهيريتها.

وصلة رقص في بيروت

اليومين اللي فاتوا مواقع التواصل الاجتماعي، مكنش عليها كلام غير مقطع الفيديو بتاع الفنانة شيرين عبد الوهاب وهي بترقص ومنسجمة على أغنيتها الشهيرة «آه يا ليل»، في أحد مطاعم بيروت.

وظهرت الفنانة في وصلة رقص هستيرية أمام جوزها حسام حبيب وبناتها «هنا ومريم»، وتعرضت بسببه لموجه انتقادات عنيفة من جمهور السوشيال ميديا اللي قالوا عليها غير متزنة.

وعانت الفنانة شيرين خلال الفترة اللي فاتت من مشاكل كتير، بدأت بانفصالها عن جوزها حسام حبيب، ثم دخولها لمصحة علاج نفسي وإدمان لمدة 20 يوم قبل ما تتعافى وترجع لجوزها مرة تانية.

 شيرين عبد الوهاب تتطاول على مصر

ووقعت الفنانة شيرين عبد الوهاب في عدة سقطات في حق مصر خلال احيائها لعدد من الحفلات خارج مصر، أولهم بعد ما طلبت منها واحدة من الجمهور في حفلها بالإمارات إنها تغني «مشربتش من نيلها» عشان ترد عليها «هيجيلي بلهاريسيا».

والموقف الثاني في حفل بدولة البحرين، إما قالت «أنا هنا أتكلم براحتي لو في مصر يسجنوني»، وده كان سبب في هجوم كبير من الجمهور عليها، واتقدم فيها بلاغ للنائب العام من المحامي سمير صبري اتهامها بالإساءة للدولة.

شيرين عبد الوهاب تسب عمرو دياب

الأزمة الجاية دي كانت من العيار التقيل، بعد ما هاجمت الفنان عمرو دياب في فرح الفنان عمرو يوسف والفنانة كندة علوش، وقالت: «معندناش في مصر غير محمد حماقي وتامر حسني، وعاوزة أقول للتاني شكلها كده راحت عليه كبر خلاص في السن واحنا اللي جايين»، عشان تتعرض لموجه انتقاد كبيرة من الجمهور عموما ومحبين الهضبة بشكل خاص.

وكمان عمرو دياب رد عليها بنفس طريقتها خلال حفلته على مسرح دار أوبرا دبي، وقال: «الصقفة دي أشهر من أغاني ومغنيين كتير موجودين على الساحة».

شيرين عبد الوهاب كورال خلف مطرب مغمور

من الازمات اللي حصلت بين الفنانة شيرين عبد الوهاب وجمهور السوشيال، اتهامها بالكذب بعد ما نفت الكلام اللي قاله شفيق نيبو واحد من المتسابقين في برنامج «أراب أيدول» إن شرين عبد الوهاب كانت بتغني كورال وراه.
بس المفاجأة بقي كانت تسريب مقطع فيديو للفنان الليبي شفيق نيبو، وكانت شيرين عبد الوهاب والفنان أحمد سعد فعلا في الكورال بتاعه، وده خلاها تتعرض لنقد كبير بسبب انكارها.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى