تخيل أن تصبح بلوجر مشهور وتعمل أي حاجة من اجل التريند!.. لكن الهدف منها ليس فقط الشهرة والتريند ولكن النصب على الناس، هذا ما فعلته البلوجر هدير عاطف التي قبض عليها خلال الساعات الماضية والتي حيرت قصتها السوشيال ميديا فما هي تفاصيل ما حدث؟ هذا ما نتعرف عليه من خلال التالي:
خلال الساعات اللي فاتت أثارت البلوجر هدير عاطف جدل كبير بعد ما ألقت قوات الأمن القبض عليها ومعها هاجر محمود أخت طليق هدير، وتامر عادل جوز هاجر، بتهمة النصب على 16 شخص.
طيب إيه اللي حصل؟
البداية لما تلقى قسم التجمع الخامس بلاغ من 6 أشخاص،ك بتعرضهم لواقعة نصب والاستيلاء على مبالغ مالية كبيرة منهم بدعوى تشغيلها في البورصة من البلوجر الشهيرة هدير عاطف وأنها معها شركاء بيشتغلوا في البورصة ولهم أسهم هتجيب لهم أرباح خيالية الفترة اللي جاية.
في نفس الوقت تلقت إدارة الأموال العامة بلاغ من 10 أشخاص آخرين بتعرضهم لواقعة نصب والاستيلاء على مبالغ مالية بدعوى تشغيلها في تجارة السيارات والعقارات من البلوجر هدير عاطف.
مع إجراء التحريات ظهرت أن البلوجر الشهير عاملة حالة من الجدل الكبير على السوشيال ميديا في الوقت اللي كل شوية بتطلع تريند بأمور غريبة زي مثلا أن طليقها طلع في مرة وأعلن أنه هيتخلص من حياته عشان يوصلوا لاكبر عدد من الناس.
ونجحت بالفعل في الشهرة وأنها تكون لها متابعين كتير وتبقى مصدر ثقة للناس ولكنها استغلت ده في أنها تعمل شبكة النصب على الناس بدعوى أنها تقدر توظف الفلوس وتجبلهم أرباح خيالية في وقت قصير من خلال علاقاتها الكتيرة.
واستغلت الناس ونجحت في أنها تكسب ملايين لكنها معرفتش تجيب أي أرباح أو حتى تدي للناس فلوسهم وده اللي عمل حالة من الجدل وخلى الناس بتدور عليها في كل مكان.
وفي ظل الجدل عليها طلعت والدة هدير عاطف ادعت في فيديو أنها هتفارق الحياة وأنها تستغيث وتطالب بالبحث عن ابنتها بعد اختفائها وقالت إن فيه بلطجية طلعوا وأخدوها وقعدت تقول الحقو بنتي هتروح مني.
لكن بالتحريات طلع أنه كل الكلام ده خدعة برضو عشان التريند وأنها تهرب من الناس وانها مختفية خوفا من الناس بعد ما نصبت عليهم.
على طول اشتغل رجال الشرطة وقدروا يحددوا مكانها ومعاها الناس اللي شغالين معها وهما أخت طليقها وجوز الأخيرة عشان يتم القبض عليهم في النهاية وإحالتهم للنيابة للتحقيق معهم بتهمة النصب على 16 شخص بوهم توظيف الفلوس في البورصة وتجارة العربيات.
