هتقي ربنا في شغلي وهبعد عن سكتهم ..عمر كمال حلف ميشتغلش مع رقاصات ورجع في كلامه .. ودينا هتقلب الدنيا عليه
لن أعمل مع راقصات مرة أخرى عايز أتقي ربنا في شغلي .. هذا الكلام ما قاله المطرب الشعبي عمر كمال خلال الفترة الأخيرة لكن لم يفعله ، وكلما حاول يبعد عن طريق الراقصات يعود من جديد.
عمر كمال بيحاول ياخد خط مختلف عن حسن شاكوش وحمو بيكا رغم انهم طلعوا مع بعض هما التلاتة ونجحوا سوا ،لكن هو لوحده عايز يعمل حاجة مختلفة ، وفجأة في يوم صحي وقرر انه خلاص هيتوب ومش هيشتغل مع الرقاصات تاني ، ولا في حفلات ولا في كليبات
وقال عمر كمال بنفسه : مش كلام بقوله علشان عايز تعاطف، أنا بس عايز اتقي ربنا شوية فى شغلي، وأنا بتعلم من غلطي، لأن جالي نقد من الجمهور في أغنية ضيعنا، اللي عملتها مع عبد الباسط لأنه كان فيها الرقاصة أوكسانا»
عمر قال الكلام ده فيديو وطلع حلف وقال انا بحاول اتعلم من اخطائي و مبقتش ادخل في مشاكل ومش بعمل اي تريندات وخلاص، وعايز اعمل شغل كويس ومش هدخل الرقاصات في شغلي تاني.
بس عمر كمال مقدرش يكون قد كلمته ورجع فيها وعمل كذا حاجة مع رقاصات بعد الكلمتين دول ، ولما اتواجه بكلامه قال شيطاني غلبني بس خلاص توبة ومش هعملها تاني وعايز اظهر بصورة كويسة للناس.
لكن المشكلة ان عمر كمال برضه من تاني مقدرش يوفي بوعده ، وقريب هينزل كليب جديد مع النجم عبد الباسط حمودة وطالعة فيه الرقاصة بوسي ، والاغنية اسمها السخان ، وظهرت الرقاصة في البرومو اللي نشره عمر كمال على صفحته
طبعا الناس اول ماشافت البرومو والرقاصة ،رجعوا افتكروا كلام عمر كمان وانه حلف وقال انه هيبطل شغل مع الرقاصات ، طب ايه ياعمر اومال ايه الكليب ده ومين بوسي دي كمان،، شكله كدا الشيطان غلبه تاني.
عمر كمال اشتغل مع كذا رقاصة ، اشهرهم لورديانا ، طبعا فاكرين فيديو اغنية انتي معلمة اللي ظهر فيه عمر وحمو بيكا وهما بيغنوا الاغنية وفي وسطهم لورديانا بترقص عليها ، والفيديو ده قلب السوشيال ميديا لان لورديانا كانت لسة نازلة بتقلها في مصر وخاربة الدنيا ، وفجأة عمر كمال وحمو بيكا عملوا اغنية انتي معلمة وعشان تنجح رحوا جابوا لورديانا وخلوها ترقص علي الاغنية وهما بيغنوها، وده قبل ما يطرحوا الاغنية اصلا ، وعشان كدا نجحت وكسرت الدنيا.
كمان اتعاون عمر كمال مع الرقاصة اوكسانا وبوسي وجوهرة وكمان الرقاصة مارجريتا اللي كانت معاه في حفلة في ملهى ليلي في الساحل الشمالي.
عمر مش قادر ياخد الخطوة طول ما في كليبات وفلوس ، ورغم انه وعد جمهوره وقال انا هبعد عن سكتهم خالص ومش هتعاون مع اي رقاصة في الاغاني بتاعتي تاني الا انه بيرجع في كلامه كل مرة والناس بتهاجمه برضه.
وقال عمر كمال الناس محبتنيش لما بظهر في مع الراقصات وكل واحد حر في شغله وربنا هو اللي هيحاسبنا لكن انا حاسس ان جمهوري بيضايق لما بيشوفوني في اي اغنية وجنبي رقاصة عشان كدا قررت اتقي ربنا في شغلي.
المفاجآة بقى ان الرقاصة دينا ردت على كلام عمر كمال اللي استفزها واعتبرته اهانة ، وقالت عن عمر كمال : “مش فاهمة أساسًا هو عايز إيه؟ عايز يتقرب من الناس.. الناس بتكشف الكذاب وهو كذاب وبعد ما تعمل اسمك من وجود رقاصة جنبك جاى دلوقتى تتنصل من الموضوع.. طب ما تقعد فى البيت”.
وقالت دينا انه مش عايز يطلع مع رقاصات لكنه بيغني في الافراح وفيها بنات بترقص برضه ، ووجهت كلامها لعمر كمال في لقاء تلفزيوني وقالت: “مليون واحدة بترقص حواليك فى الفرح زعلان أوى من الرقص دلوقتى.. أنا ما بحبش النفاق والكذب”
ياترى عمل كمال فعلا هيتوقف عن الظهور مع رقاصات في كليباته الجاية وهيحاول يبعد نفسه من الدايرة دي ولا شيطانه هيغلبه من تاني؟
