معمول لها عمل وشغل غريب والذي فعله اعترف به ، وأيضا عرافة اتنبأت بمعاد رحيلها، أكشن ومغامرات كتيرة تعيشها الفنانة فيفي عبده التي عانت من العديد من الأزمات الصحية خلال السنوات الأخيرة، وظهرت تستغيث مؤخرا وبدأت تذهب للدجالين من أجل فك العمل، فماذا يحدث للفنانة فيفي عبدة.
الست بعد ما كانت نجمة زمانها وهي صغيرة واشهر رقاصة في مصر ، فجأة لما كبرت حالها اتبدل وكل شوية ترقدلها شهرين تلاتة في السرير وتحصلها مصيبة في حياتها ، ولأنها بتؤمن بالأعمال والسحر والكلام ده فطلعت قالت من فترة ان اللي بيحصلها مش طبيعي وفضلت تطلب من اللي عملها عمل يفكه بأي تمن
الغريبة بقى ان في واحدة عرافة اسمها ليلى عبد اللطيف اتبنأت بحياة فيفي عبده وهتعيش كام سنة ، وقابلتها زمان وقالتلها انك هتعيش لحد سن ال80 ، ورجعت فيفي عبده قابلتها تاني و صورت معاها فيديو ونشرته وهي زعلانة انها هتعيش 80 بس وقالت عايزة اعيش اكتر من كدا
فيفي عبده مش مركزة في اي حاجة في حياتها دلوقتي غير السحر اللي معمولها وحياتها اللي قربت تنتهي لأنها صدقت العرافة اللي قالتلها انها هتعيش 80 سنة بس ، وبتلف على الدجالين عشان تفك السحر اللي معمولها وعرفت كمان مين اللي عمله
فيفي دلوقتي عندها 70 سنة ، وعشان كدا خايفة لما العرافة قالتلها انها هتعيش 80 سنة ، يعني في وجهة نظرها خايفة تموت في العشر سنين الجايين ،، بس الاعمار بيد الله يا فيفي ومحدش عارف هيموت امتى
طب مين بقى اللي طلع عاملها سحر ؟
مش هتصدق بعد ما فيفي طلعت استغاثت وقالت ابو ايدك فك العمل ، طلع المنتج أحمد الزواوي هو السبب في كل اللي حصلها واعترف انه فعلا عملها سحر عشان هي أذته ونصبت عليه في فلوسه وشقى عمره وكل اللي كان حيلته فقرر يأذيها زي ما هي عملت فيه.
الخلاف ده حصل سنة 2017 بسبب فيلم كان المفروض يتعمل، وقال انها نصبت عليه في نص مليون جنيه ومعرفش ياخد حقه منها فقرر يروح لدجال يعملها سحر عشان يشقلب حياتها وينتقم منها
الغريبة ان المنتج ده كان جرئ جدا وعمل مداخلة هاتفية في برنامج من كام يوم واعترف على الهوا باللي عمله وقال : والله العظيم اللي فيفي فيه بسببي، أنا طلبت حقي بالقانون وبالأصول، وأذيتها زي ما هي أذتني، ولو طولت أموتها هموتها إيه المشكلة؟ مش هي أذتني؟ لو افترضنا أن النص مليون جنيه في 2017، كان كل ما أملك أو تحويشة العمر، وضاع مني يبقى مش مستقبلي ضاع؟ يعني هي تضيع مستقبلي وأنا مأذيهاش؟
مش كدا وبس ، ده قال كمان : أنا بتعامل بالقانون الإلهي، الجزاء من جنس العمل، وعجزتها زي ما عجزتني، والنهاردة في أجزاء في جسمها مبتتحركش، بكرة في أجزاء بتتحرك هتقف. . فيفي عبده محدش هيحس باللي فيها إلا هي، وهي عارفة جالها إزاي ،، وانا معرفتش اخد حقي منها بالقانون فهعمل اي حاجة عشان اخد حقي، وحاولت أخد حقي بكل الطرق ومعرفتش والنقابة معرفتش تجيب لي حقي حتى الوسطاء اللي تدخلوا معرفوش يجيبولي حقي وكان لازم ألجأ لحاجة بقى نسميها قرصة ودن”
الراجل صدم الناس بكلامه ، ومستحيل يطلع يتبلى على نفسه ويقول حاجة محصلتش ، وعشان كدا طلع واحد تاني واتعهد بعلاج فيفي عبده من السحر اللي معملوها وقال انا هخليها تمشي علي رجليها تاني ، وهي لحد دلوقتي في حالة صدمة من اللي سعته وبتلف على الدجالين والشيوخ عشان تلاقي حد يساعدها بعد ما اتأكدت ان فيها حاجة غلط
ومن كام يوم نشرت فيفي عبده فيديو ليها وهي تعبانة وبتعمل تحاليل ، وقالت ان دي بقت حياتي كل يوم وربنا يأذي المؤذي ومش مسامحة اي حد بيحاول يبوظلي حياتي ويعمل فيا كدا
الحاجة الوحيدة الحلوة في الموضوع ان فيفي عبده لسة محتفظة ببهجتها وحبها للحياة وقالت انا بحب الرقص وهفضل ارقص لحد ماموت ، ولسة بتحب تلبس وترقص وتضحك وتتصور ، بس ياترى فيفي بقى هتعمل ايه في الراجل اللي عملها سحر؟
