مفاجأت شهادات الادخار لم تنتهي والسباق بين البنوك لطرح أعلى عائد مازال مستمر، فهل تتخيل ان في شهادة تعطيك عائد 39%؟ نعم كما قرأت عائد 39%!.. فياتري ما تفاصيل الشهادة؟
طيب تعرف ازاي اذا كانت احسن من شهادات ال ١٩٪ بفايدة ثابتة، أو 22% بفايدة متناقصة؟ واخيرا بقى ايه اللي قاله عمرو أديب عن شهادات الادخار؟
شهادة جديدة من بنك التنمية الصناعية مدتها 3 سنوات زي أغلب شهادات البنوك التانية بس أكبر ميزة فيها سعر الفايدة، طب ازاي؟
الفكرة في الشهادة الجديدة تحت اسم اختيارك، ان العائد تراكمي بنسبة 39% وكمان هينزل في حسابك من تاني يوم شراء الشهادة، يعني هتاخده مقدم ومش هتشغل بالك بدورية صرف العائد.
وبحسبة بسيطة، لو اشتريت شهادة بنك التنمية الصناعية ب100 ألف ، تاني يوم هينزل في حسابك 39 ألف جنيه، بس خلي بالك الشهادة ليها شروط:
يعني الحد الادنى للشراء ميقلش عن 50 ألف جنيه ومضاعفات 5 آلاف جنيه, يعني 50 ألف، 55 ألف، و60 ألف جنيه وهكذا…
وطبعا متقدرش تكسر الشهادة الا بعد مرور 6 شهور على شرائها ، وفي الحالة دي هتدفع غرامات الاسترداد بسبب إلغائها قبل انتهاء مدتها.
وحسب الجدول المعلن من البنك، الغرامات على كسر الشهادة بتتخصم من إجمالي العائد اللي حصل عليه العميل، وقيمها بتختلف حسب وقت الاسترداد، يعني هتبقى 7% في السنة الأولى، و6% في التانية، و5% في السنة التالتة.
وطبعا انت بتسأل دلوقتي هي احسن ولا الشهادات الجديدة في بنكي الأهلي ومصر؟بص ياسيدي لو هنتكلم عن شهادة الـ19 بعائد ثابت، تقدر تقول ان العائد في 3 سنين 57% ، يعني ال100 ألف في ال3 سنين هتكسب 57 ألف جنيه، هتقبضهم متقسمين على 36 شهر
وبالنسبة للشهادة ذات الفايدة المتناقصة، العائد في ال3 سنين كلهم 56%، يعني المكسب في ال100 ألف جنيه هيساوي 56 ألف جنيه، بس فكرتها ان عائد اول سنة 22 ألف، وتاني سنة 18 ألف، وتالت سنة 16 ألف، وبرضه العائد شهري بس قيمته بتختلف حسب السنة.
وبكده أكبر ميزة في شهادة بنك التنمية الصناعية انك بتاخد العائد كله مرة واحدة، وده هيكون مفيد ليك لو عاوز تحطه في استثمار تاني، زي شهادة جديدة أو دهب مثلا.
وهنا بقى يفضل اخر سؤال: هل متوقع طرح شهادات جديدة بفايدة أعلى الفترة الجاية وإيه علاقة عمرو أديب؟
يحي ابو الفتوح نائب رئيس البنك الأهلي سبق ونفى اي نية لطرح شهادات بفايدة 25 أو 30%وعلى الناحية التانية عمرو أديب توقع طرح البنوك المصرية خلال الفترة الجاية ، شهادات بنسبة كويسة.وقال ان ده امر مطروح بقوة في البنوك ، لكن بنسبة كام بالظبط؟ محددش
انتوا بقي رايكم إيه في الشهادة الجديدة من بنك التنمية الصناعية؟ ولو عاوزين تحطوا فلوسكم في شهادة: هتختاروها ولا هتختاروا شهادات بنكي الأهلي ومصر؟
شاركونا في التعليقات
