هذا العام نرى في مسلسلات رمضان مواهب فنية ليست جديدة لكن تمثل لأول مرة.. ومسلسل الفنانة يسرا فتح فرصة لكثير من مشاهير السوشيال ميديا يمثلوا ويظهروا معاها، بس التجربة الأبرز في مسلسلها هذا العام هو مشاركة عنبة مغني المهرجانات.
عنبة من المغنيين المشهورين جدا خلال الفترة اللي فاتت.. من ساعة الكورونا.. وكليب طيارات اللي صوره بإمكانيات بسيطة جدا في منطقته دار السلام.. وهو راكب على الموجة.. وبيمزج ما بين الراب والمهرجانات بطريقة لفتت نظر الشباب
عنبة “اللي اسمه الحقيقي مصطفى”.. رغم إن كل كلام أغانيه عن الشبحنة.. ويبان كده إنه محدش بيعرف يكلمه.. بس في الحقيقة هو شخص كيوت جدا.. لقى نفسه في منطقة المزيكا والمهرجانات.. وبيعمل مع صحابه يانج ودوبل زوكش أغاني وكليبات ليها طابع خاص.
لدرجة إن وصل للعالمية مع الفنان أحمد سعد بأغنية الملوك.. اللي فرقت في مشوار أحمد سعد الفني أكتر منهم.. هما كده كده جامدين.. ومشاهدت أغانيهم على اليوتيوب والجمهور اللي بيحضر حفلاتهم يشهد على كده.
وكان طبيعي إنه يوصل لمنطقة جديدة في مجال الفن زي كتير من شباب الغنا اللي موجودين على الساحة وأبرزهم ويجز وشاهين طبعا.. والسنة دي خد فرصته مع الفنانة يسرا في مسلسلها الرمضاني ألف حمد الله عالسلامة.
عنبة بيقدم شخصية “علي بويكا”.. في مسلسل يسرا.. الشاب الجدع البسيط اللي وقعته الصدفة في مايان السيد.. عشان يساعدها بعد ما تاهت من مامتها وهي راجعة من كندا متعرفش حاجة في مصر.. فجأة لقت نفسها في منطقة شعبية وفي بيت بويكا وبتلبس لبس مامته والجلابية.. بس الحقيقة هو خاطف الكاميرا منها خالص.
عنبة رغم إنه جديد قدام الكاميرا وتمثيله يمكن مش أقوى حاجة.. بس دمه خفيف والناس بتحبه.. وحتى لما ظهر مع مايان السيد في تيك توك.. الناس اتبسطت منه أكتر منها.
عارفين يعني ايه يسرا تتنبأ له بالنجاح.. وتغامر بيه في مسلسلها الرمضاني اللي كلنا عارفين هي بتبقى حريصة على النجاح بيه قد ايه.. وتقول إنها شايفة فيه موهبة ناجحة ومستقبل مبهر
عنبة خطواته كلها ناجحة.. ومن الناس اللي بتشتغل في صمت.. مع شوية نكش كده على السوشيال ميديا وده طبع مغنيين الراب والمهرجانات عموما الفترة اللي فاتت.. غير كده هو إنسان بسيط جدا.
عنبة رغم الشهرة والفلوس والنجاح الكبير اللي حققه الفترة اللي فاتت.. إلا إنه مبينساش أصله.. ورغم أي حاجة لسه عايش في دار السلام وسط أهله وناسه.. ودي حاجة هو بيفتخر بيها.. لو عاوز تشوفه هتلاقيه قاعد على قهوة تحت بيته هناك.. أو عند الحلاق اللي في منطقته.. ودي حاجة هو حريص عليها جدا ومش هتتغير مع الزمن .. هنشوف.
