واجه المصريين أزمة جديدة في ارتفاع أسعار السلع الغذائية خلال هذه الأيام، خصوصا أسعار البيض والتي قفزت أسعارها بشكل مبالغ فيه دي تقريبًا تضاعفت في فترة قليلة.
وخلال الأيام القليلة الماضية، قفزت أسعار كرتونة البيض بشكل غير طبيعي في السوق المحلي، وتجاوز ثمنها 90 جنيه مقارنة بـ30 جنيها قبل بضعة أشهر، وسط حيرة ودهشة الأسر المصرية من هذه الزيادات الجنونية، طب ياترى إيه أسباب الزيادات دي وهل الأسعار هتتراجع مع بداية العام الجديد، تعالوا نعرف الإجابة في التقرير التالي:
عمرنا ما كنا نتخيل إن كرتونة البيض اللي سعرها كان من كام شهر 30 جنيه تكسر حاجز الـ100 جنيه ، وده حصل فعلا بعد ما وصلت أسعار البيض فى مصر لـ مستويات قياسية محصلتش قبل كده، وده اللي خلى كرتونة البيض توصل النهاردة لسعر 100 جنيه و 105 في بعض المتاجر، وبالرغم من إن مصريين كتير بطلوا يشتروا البيض بسبب ارتفاع سعره إلا إن سعر البيض لسه بيواصل ارتفاعة.
الدولة الحقيقة مش ساكتة وأول ما بدأ التجار يغلوا كرتونة البيض بالشكل ده وزارة التموين بسرعة أعلنت عن وجود كميات كبيرة من البيض، ومش بس كده دي كمان وفرت لحوم ودواجن مجمدة وطازجة في كل منافذ المجمعات الاستهلاكية وفروع الشركات التابعة للوزارة في مختلف المحافظات على مستوى الجمهورية، وده بأسعار مخفضة عن السوق بـ 20% .
دي كمان وزارة التموين طرحت البيض بسعر 68 جنيها للكرتونة اللي فيها 30 بيضة، وكرتونة البيض الأحمر المغلف بسعر 74 جنيها، والدواجن المجمدة إنتاج محلي نزلتها بسعر 65 جنيه، واللحوم الطازجة السودانية بسعر 115 جنيها للكيلو.
طب تفتكروا ليه الأسعار مستمرة في الارتفاع؟
وبعد ماراثون من الارتفاعات الهائلة خلال الفترة اللي فاتت لأسعار الأعلاف كسر فيه طن العلف حاجز الـ22 ألف جنيه بالطن، بدأت الأسعار تتراجع دلوقتي بشكل كبير لكن بردو البيض بردو سعره منزلش!
وقال خبراء الاقتصاد إن أسعار الأعلاف تراجعت بالتزامن مع الإفراج عن بعض الكميات المكدسة في الموانئ، ده غير كمان انخفاض سعر الدولار في السوق السوداء، اللي ساهم في زيادة المعروض بالأسواق، وبرروا ارتفاعات أسعار البيض لجشع التجار اللي استغله الأزمة وما صدقوا يعلوا الأسعار.
ومن فترة قريبة ومع ارتفاع أسعار البيض بشكل مش متعودين عليه دشن بعض المواطنين حملة قوية على وسائل التواصل الاجتماعي لمقاطعة شراء البيض تحت أسم “خلوه_يفقس” لمدة 10 أيام مستهدفين منها إنه ينزل سعره بعد زيادة المعروض.
تفتكروا المقاطعة هي الحل عشان أسعار البيض ترجع لطبيعتها؟
