حالة من الحزن تعيشها الفنانة رشا سامي العدل، ابنة الفنان الراحل سامي العدل، بعد وفاة المخرج سامح عبدالعزيز الذي وافته المنية فجر اليوم عن عمر ناهز 49 عامًا، إثر أزمة مرضية مفاجئة.وفي وداع مؤثر، كشفت رشا سامي العدل عن علاقة إنسانية خاصة جمعتها بالراحل، لم يكن أحد يعلم عنها شيئًا، وكتبت عبر حسابها الشخصي على موقع «فيسبوك» تقول:«وجعت قلبي وقهرتني على الصبح، أكتر ما هو موجوع في ذكرى وفاة بابا، مشيت ورحلت عنّا، أنا عمري ما طلّعت الكلام ده، ولا قلته أو وريته لحد، بس حقك عليّ دلوقتي أقول، وربنا يشهد على كلامي، إنك من أجدع الأصدقاء وأوفاهم».
وأضافت رشا: «أنا منزلة موقفين من ضمن مواقف كتير معايا أنا شخصيًا، بس بعضهم شخصي بزيادة فامتنعت عن نشرهم طبعًا، لما بابا تعب، سامح رغم شغله وانشغاله في موسم رمضان، كان متابع معايا لحظة بلحظة، تليفونات ورسائل ماسنجر، وزيارات رغم إن ماكنش بيتسمح بزيارات قوي. بس ده ما منعهش إنه ييجي ويجرب، وماسابنيش طول فترة تعب بابا، وبعدها كان بيحرص إنه يطمن عليّ من وقت للتاني ويسألني لو محتاجة حاجة أو ناقصني شيء».
وأوضحت: «لما فتحت مشروع صغير وقررت أعمل أكل وأبيعه، كان أول واحد مصمم يشاركني ونفتح مطعم في القاهرة، وكل شوية يكلمني: «هاه يالا بقى».وأنا أقول له: «لسه شوية على الخطوة دي يا موحا، ونفسيًا مش قادرة أنزل القاهرة دلوقتي».
وتابعت: «يسكت أسبوع أو اتنين، ويرجع يكلمني: «يا بنتي فكري بقى، تعبتيني»، أقوله: «ما إحنا لسه متكلمين»، يقول لي: «ولسه برضه بتعنّدي؟»، ويقعد يقنعني: «طيب يا رشا، انتي بالمجهود، وأنا رأس المال، أقول له: «مش ده اللي معطلني»، يسيبني شوية ويرجع يكلمني تاني، كان بيحاول يشجعني على الخطوة باستمرار».
وأكدت: «سامح صاحبي، صديقي، وأخويا الجدع، ماكنش حد يعرف إن سامح أصلًا صديقي من زمان، بعيد عن بابا والعيلة والوسط الفني، من قبليهم كمان، وكان له مكانة خاصة قوي في قلبي، بابا كان بيحبه جدًا، وهو كمان كان بيعشقه، أديك روحت له يا موحا، وسيبتوني هنا لوحدي، بس أنا مش هاسيبكم، وهفضل فاكرة، وبدعيلكم، ووعد، مش هنســاك، ولا هاقطع دعواتي ليك يا غالي، مع السلامة يا صديقي الجدع الطيب، الله يرحمك ويغفر لك، ويسكنك الفردوس الأعلى، من غير حساب ولا سابق عذاب، وداعًا سامح عبدالعزيز».
