أخبار الاقتصاد

الحكومة تعلن مفاجأة بشأن تعيين 70 ألف موظف بالقطاع الحكومي في هذا الموعد..

الحكومة عاملة مسابقة جديدة ستعين فيها 70 ألف موظف بالقطاع الحكومي في مختلف قطاعات الدولة وطبعا هذا خبر غير عادي، فإن كنت تبحث عن التعيين في الحكومة تابعنا من خلال هذا التقرير:

عشان نقولك تفاصيل الوظائف الجديدة وإزاي تقدم عليها، وهل فعلا في تعيينات جديدة في الدولة؟ واستنوا مفاجأة خاصة بترقيات العاملين بالقطاع الحكومي:

وزير المالية الدكتور محمد معيط اتكلم قدام البرلمان وقال إن الموازنة الجديدة كانت حريصة على الارتقاء بالقطاع الصحي وقطاعات التعليم وكمان أحوال العاملين بالدولة.

وعشان كده الدولة زودة مخصصات الاستثمارات الحكومة لـ 587 مليار جنيه والهدف من الزيادة دي إن الحكومة من الاخر تخلق وظائف جديدة للمواطنين.

والخبر اللي يفرح إن وزير المالية أعلن إن الوزارة خصصت 3.7 مليار جنيه عشان تعين 70 ألف من المعلمين والأطباء والصيادلة والاحتياجات التانيه في مختلف قطاعات الدولة وده لموازنة السنة المالية الجديدة 2023/2024 .

مش بس كده ده كمان حدد نص مليار جنيه عشان يعمل حركة ترقيات للعاملين بالدولة.أما بقى نصيب الأسد في التعينات دي كان للمعلمين واللي ذكرهم وزير المالية وقال إن العام المالي المقبل 2023/2024، هيشهد الإعلان عن مسابقة جديدة لتعيين 30 ألف معلم، لسد العجز في المعلمين، وده عشان الدولة تكمل سلسلة التعيينات اللي بدأتها.

وخلال عرض وزير المالية لـ مشروع الموازنة العامة للدولة للسنة الجديدة قال إنه هيتم تعيين 30 ألف من الأطباء والصيادلة.مش بس كده ده كمان اتكلم في البرلمان عن تعيين 10 آلاف موظف في كافة مؤسسات الدولة.

أما بقى المفاجأة اللي وجهها لـ العاملين بالقطاع الحكومة فـ معيط قال إن من مستهدفات العام المالي المقبل إن الدولة تزود حد الإعفاء الضريبي لـ 50% للعاملين في كل القطاعات الحكومي سواء العام أوالخاص.

طيب ياترى إيه اللي خلى الحكومة تبدأ تفكر تعين ناس جديدة في الدولة بعد ما كانت حركة التعيينات شبه متوقفة؟

الدكتور رضا حجازي، وزير التربية والتعليم، فـ في تصريحات سابقة نشرها موقع مصراوي قال إن الحكومة بتستهدف ضمن خطة موازنتها تعيين 150 ألف معلم مساعد على مدار خمس سنين

وده من خلال مسابقات بينظمها الجهاز المركزي للتنظيم والإدارة بالتعاون مع الوزارة والجهات المعنية.
وقال إن الخطة دي بدأت بالفعل وتم الإعلان عن مسابقة تعيين 30 ألف معلم مساعد (رياض أطفال ومعلم فصل) في 2022

وفـ فبراير 2023 أعلنت الحكومة عن مسابقة لتعيين 30 ألف معلم فصل؛ وده للمساهمة في سد العجز في أعداد معلمي الصفوف الأولى.

وحسب تصريحات وزير المالية واللي أعلن عنها في البرلمان فـ الحكومة بتستهدف تقليل معدلات البطالة وكمان زيادة معدل النمو في الموازنة الخاصة بـ العام المالي الجديد 2023/ 2024 عشان يوصل لـ 4.1%.

مش بس كده ده كمان شايف إن اقتصادنا بخير وقادر على تجاوز التحديات الدولية اللي بنشوفها الفترة دي، وإننا قادرين نعدي الأزمة العالمية زي ما عدينا التحديات اللي عيشناها قبل كده .

وعشان كده الحكومة داخلة السنة المالية الجديدة بموازنة طموحة بتستهدف تحقيق معدلات نمو وإنتاج وتعافي اقتصادي وتحقيق أعلى نسبة فائض أولي بـ 2.5% من الناتج المحلي وده عشان يكون احتياطي لأي أزمة نواجهها لقدر الله.

دلوقتي قولنا وبكل صراحة إيه رأيك في قرارات الحكومة الأخيرة خاصة حركة التعيينات وزيادة معدلات الأجور في مصر؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى