السلع المعمره، والمشروبات الغازية مثل بيبسي، وكاكولا وأيضا السينما، والملاهي والمسارح، واماكن الترفيه عامة، هذا غير السلع المستوردة
كل هذه خدمات وسلع اتقال إن الحكرمة ناوية تفرض عليها رسوم جديدة، فياتري الحقيقة فين؟ وإيه السلع بظبط اللي هتزيد أسعارها والزيادة دي في صالح مين؟
وإيه حكاية الـ 100 جنيه اللي المصريين هيدفعوها لو فكروا يسافروا للخارج؟ ، خليكوا معانا في الحلقة دي واحنا نقولكم كل التفاصيل:
لجنة الخطة والموازنة بمجلس النواب، برئاسة الدكتور فخري الفقي، وافقت على مشروع قانون بتعديل قانون ضريبة الدمغة ورسم تنمية الموارد وضريبة دخول المسرح والملاهي، حسب مصرواي
وخلال الساعات اللي فاتت، حصل جدل كبير بسبب نوعية السلع اللي اتفرض عليها رسوم جديدة وده اللي انتشر في البداية:
فرض 3 % من قيمة كل سلعة تشتري من الأسواق الحرة بحد أدنى دولار ونص بما فيها لتر واحد من المشروبات الروحية.
وكمان تحصیل 10 ٪ من قيمة كل لتر إضافي من المشروبات الروحية المصرح بها للاستعمال الشخصي، وبحد أدني 12 دولار
أما بقى بالنسبة للمشروبات الغازية بكل أنواعها سواء كانت مشروبات غازية صودا أو مشروبات غازية معطرة ومحلاة أو غير محلاة معبأة في زجاجات أو أوعية أخرى سواء كانت منتجة محليا أو مستوردة فهيتم خصم 5% ضريبة بحد أدني 25 قرش.
لكن الدكتور فخري الفقي، رئيس لجنة الخطة والموازنة بمجلس النواب، طلع يحسم الجدل في تصريحاته لـ برنامج يحدث في مصر.
وقال إن قانون فرض 3% رسوم من قيمة كل سلعة تشترى من الأسواق الحرة، سبق واتعرض على مجلس النواب من سنة لكن تم رفضه.
والقانون الحديد مفيش فيه اي رسوم جديدة على المشروبات الغازية أو السلع المعمرة، بس فرض 10% من قيمة الفاتورة على الأغراض الجمركية على سلع زي السالمون، الجمبري، والاستاكوزا، والجبنة الريكفورد، والكافيار، والفواكهة المستوردة الطازجة والمجففة، والبن المحمص.
وكمان أجهزة الحلاقة الكهربية وتروسيكلات وسكوترات وقداحات السجائر .كمان هيتم فرض ضرائب على ساعات اليد والجيب وسماعات الأذن
مش بس كده ده كمان هيتم فرض رسوم 100 جنيه على المصريين عند مغادرة البلاد لكن الضريبة دي هيستثنى منها الأجانب القادمين بغرض السياحة فقط و هيدفعوا 50 جنيه بس
طيب بالنسبة للمسارح والملاهي إيه الحكاية؟
حسب التعديلات المنشورة، هيتم فرض ضريبة مقابل دخول المسارح وغيرها من أماكن الفرجة وأي مكان من أماكن الملاهي والعروض والحفلات وأنشطة الترفيه وقضاء الوقت وأماكن الألعاب
كمان هيتم فرض ضريبة 5% مقابل دخول الأفلام الأجنبية وعروض الأوبرا أو الباليه وعروض السيرك المصري
و10% على الحفلات العامة في الأندية الرياضية أو الاجتماعية، واللي بـ تنظمها مجالس إدارات الأندية دي .
مش بس كده دي كمان تعديلات القانون الجديد بتنص على فرض 5% بحد أدنى 10 جنيه على الحفلات والعروض الغنائية والموسيقية أو الاستعراضية، وحفلات الأكل والمشروبات المصحوبة بموسيقى أو رقص، والحفلات الراقصة وأي أماكن بيقدم فيها عروض غنائية أو راقصة.
كما نصّ القانون على فرض 15% على عروض السيرك الأجنبي وعروض التزلج على الجليد أو على الماء أو البالون الطائر بغرض الترفيه، و20% عروض الأسماك والحيوانات، ونشاط الغوص والأدوات اللازمة بقصد الفرجة أو اللهو وحفلات السفاري.
والسؤال بقى: طيب ليه الزيادات دي؟
هقولك ياسيدي حسب تصريحات ياسر عمر، وكيل لجنة الخطة بالبرلمان، قال لـ موقع مصرواي إن الرسوم الضريبة تصب في مصلحة المواطن.
وقال كمان إن الضريبة الجديدة بتحقق ٥ مليارات جنيه للدولة وبيروح جزء كبير منهم للدعم بالموازنة العامة الجديدة للدولة.
ودلوقتي بقى قولنا رأيك في الضرايب الجديدة اللي فرضتها الدولة؟
