أخبار الاقتصاد

مفاجأة شهادة رد الجميل .. صرف 100 جنيه لكل المستفيدين من برنامج كرامة

لو كبرت في السن وطلعت عالمعاش، فيه 100 جنيه هدية من الحكومة ليك، ومش بس كده، في مزايا تانية كمان تقدر تقدم عليها من دلوقتي والسر في شهر أكتوبر.

خليكوا معانا عشان تعرفوا تفاصيل القرارات الجديدة للحكومة بمناسبة يوم المسنين العالمي.

نيفين القباج، وزيرة التضامن الاجتماعي، أعلنت عن حزمة من القرارات هتنفذها الوزارة للمسنين وكبار السن تقديرًا لمكانتهم، واحتفالات باليوم العالمي للمسنين الموافق لتاريخ 1 أكتوبر من كل سنة.

وقرارات الوزارة هي زيادة 100 جنيه لكل المستفيدين من برنامج كرامة لمدة شهر واحد.

كمان لو ظروفك تمنعك من صرف المعاش بنفسك، دلوقتي الوزرا ة فتح الباب لخدمة توصيل المعاشات للمنازل مجانا، ودا لكبار السن غير القادرين على التنقل بتمويل من وزارة التضامن الاجتماعي وهيئة البريد.

كمان أعلنت الوزيرة عن منح عضوية مجانية بنوادي المسنين، بعدد 192 نادي على مستوى الجمهورية، خلال شهر أكتوبر، وقررت فتح باب التطوع لزيارة وخدمة المسنين في مؤسسات الرعاية.

ولو شغال في حرفة معينة وسنك معدي ال65 سنة، تقدر دلوقتي تشترك في معرض ديارنا للحرف التراثية ببلاش، عشان تزود فرص البيع بتاعتك وتتعرف اكتر.

كمان هيستمر بنك ناصر الاجتماعي التابع للوزارة في طرح شهادة ادخار رد الجميل، الشهادة مدتها 3 سنين ، ومخصصة لكبار السن بس، وسعر العائد عليها 15.25% لو هيتصرف كل سنة سنويا، أو 14.5% لو كل 3 شهور ، واخيرا 14.25% لو العائد هيتصرف كل شهر.

في الوقت نفسه، وعدت الوزيرة بإصدار قانون المسنين في دورة مجلس النواب الحالية، بهدف تهيئة الظروف المناسبة ليهم للمعيشة الكريمة، بطريقة تحترم كرامتهم وتضمن حقهم في الحياة.

ومشروع القانون بيضمن حقوق المسنين الاقتصادية والثقافية والاجتماعية والترفيهية، وتوفير معاش ليهم .

كمان ألزم الدولة بمراعاة المسنين في تخطيطها للمرافق العامة، ومنح الفرصة للمسنين لمواصلة التعليم في المراحل الإعدادية والثانوية، وصولا للتعليم الجامعي، من خلال الهيئة العامة لتعليم الكبار الفرصة

وهتوفر الدولة معاش لكبار السن من عمر ال65 سنة للي عندهم ظروف ومالهمش دخل ولا معاش تأميني، بجانب إنشاء دور الرعاية الخاصة بكبار السن وافتتاح أندية رعاية نهارية لهم، وإطلاق وثيقة مكتوبة خاصة بحقوق المسنين بالتعاون مع منظمات المجتمع المدني.

وهيقدم القانون إعفاء جزئي من تذاكر وسائل المواصلات وغيرها، وكمان الحق في الرعاية النفسية وإعادة التأهيل للمسن.

دا غير التوسع في برامج الحماية الاجتماعية الممنوحة للمسنين، وزيادة المخصصات المالية المتاحة لمؤسسات الرعاية الاجتماعية الحكومية، وتعزيز التفتيش عليها.

.
وأهم نقطة في القانون المنتظر هو إنشاء صندوق بوزارة التضامن الاجتماعي اسمه “صندوق رعاية المسنين”، تحت إشراف رئيس مجلس الوزراء، ومسموح لمجلس إدارة الصندوق إنشاء فروع أخرى له في المحافظات.

في النهاية بقى عاوزين نعرف تعليقكم على قرارات وزارة التضامن بمناسبة يوم المسنين العالمي، وايه رأيكم في القانون المنتظر؟ هل مستنيين القانون الجديد يحل مشاكل معينة؟ شاركونا في التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى