أخبار الاقتصاد

هل هذا الوقت مناسب لشراء الذهب أم لا؟..مفاجأة في أسعار الذهب الأيام القادمة

تفتكروا ماذا يحدث في سوق الذهب؟ وما سبب الارتفاع المفاجئ والانخفاض المفاجئ أيضا؟وياترى من المتحكم في سوق الذهب؟ تابعونا لمعرفة الاسرار.

الدهب حير الناس يوم في الطالع ويوم في النازل، ومحدش عارف أسعار الدهب الفترة الجاية هتزيد ولا هتقل ويا ترى إيه اللي بيتحكم في ارتفاع أو انخفاض الدهب ؟

وحسب تصريحات هاني ميلاد رئيس الشعبة العامة للذهب، لـ موقع فيتو فهو كان شايف إن انخفاض أو تراجع أسعار المعدن الأصفر في مصر متوقف على السعر العالمي، غير كمان حركة العرض والطلب.

لكن اللي يطمن إنه أكد إن مفيش أي تلاعب في اسعار الدهب بالسوق المحلي زي ما بيتقال ، وإن المستهلك هو من بيقدر يتحكم في السعر وده طبعا لو كان في هدوء وعقل في الشراء”.

بمعنى إنه في ناس بمجرد ما بيحصل أي حدث اقتصادي بتجري تشتري دهب وده طبعا بيزود الطلب عليه بشكل كبير وبيساعد إن الأسعار تزيد.

ولو حيران تشتري ولا لأ فـ نادي نجيب، سكرتير شعبة الذهب بالغرفة التجارية سابقا قال في تصريحات للوطن إن الوقت الحالي هو الأفضل والأمثل لشراء الدهب عيار 21 الأكثر مبيعًا, لكن نصح المواطنين بـ التريث في بيع الدهب وده لأنه توقع ارتفاع الأسعار مرة تانيه.

ولو بتفكر إن اسعار الدهب عالميًا منخفضة فـ انت غلطان وده لأن أسعار الذهب عالميا ارتفعت متأثرة بتراجع طفيف للدولار والعائد على سندات الخزانة وده طبعا بالتزامن مع أزمة سقف الدين الأمريكي وعشان كده زاد سعر الدهب العالمي 0.2% في المعاملات الفورية وسجل 1977 دولار للأونصة .

تأثير طرح أول صندوق للذهب فى مصر على الأسواق المحلية

حسب تصريحات رانيا يعقوب خبيرة أسواق المال قال لموقع فيتو إن طرح أول صندوق للدهب فى مصر خطوة هامة جدا بـ تستهدف حماية المواطن المصرى

وده لأنها هتوفرله فرص للاستثمار وطرق جديدة تساعده على استثمار أمواله بشكل آمن، ده غير إنه هيساعده على الادخار وزيادة معدلات استثماره وده لأن النوع ده من الاستثمار بيتميز بأنه استثمار طويل المدى.

وقالت كمان أن صناديق الاستثمار في المعادن بتعتبر وواحدة من أفضل طرق الاستثمار واللي بتساعد على حماية فلوس المستثمرين، وحفظ قيمة فلوسهم.

قالت كمان إن الصندوق بيعتبر فرصة جديدة للمواطن المصرى وخاصة صغار المستثمرين اللي بيدوروا على فرص استثمارية كويسة فى ظل التضخم وعدم استقرار أسعار الصرف، وكمان ده هيحميهم من الأزمات العالمية والمحلية اللي بتضغط على قيمة العملة وبتتسبب في إضعافها فى تلبية الاحتياجات الحياتية.

قولنا دلوقتي أخر مرة اشتريت دهب كان بكام ؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى