كيف يتزوج سياسي من ممثلة؟ هل فقد عقله؟ هذا كان تعليق العديد من الجمهور على خير زواج عمرو حمزاوى والفنانة بسمة وبعد علاقة حب هزت الوسط الفنى والسياسى بدأت من ثورة يناير، واستمرت لمدة 7 سنوات، وفجأة حدث الانفصال بعد سنوات من الهدوءفماذا حدث، وما سر غياب بسمة كل هذه المدة عن الفن، ولماذا ترفض إقامة ابنتها في أمريكا مع والدها؟ هذا ما نتعرف عليه من خلال التالي:
هو إحنا فى إيه ولا إيه؟ دة كان وقت حب وجواز؟ كل الجمهور تقريبا علق على خبر جواز الفنانة بسمة من عمرو حمزاوى علشان التوقيت كان فى ثورة يناير ، على أساس أنتو منعتوا الأفراح والجواز ساعتها ؟ ده البلد كانت مقلوبة والأفراح شغالة فى البواخر النيلية .
رغم إنكار كل واحد منهم وجود علاقة حب ،جمعهم حادث سرقة فى نفس التوقيت وفى نفس المنطقة فالناس قالت إن أكيد الموضوع فى إن ، حمزاوى قال مبدهاش بقى وأعلن عن حبه ده لما كتب مقال أشك وأكد إن بسمة سيدة قلبه / الجمهور عمره ما يشك فى حاجة وتطلع شائعة أبدا.
وبعد جواز إستمر 7 سنين منهم سنتن فى أمريكا وده بسبب بعض القضايا السياسية اللى كان متهم فيها عمرو حمزاوى وإتمنع من العودة لمصر، رجعت بسمة لمصر وإختفت حوالى 4 سنين عن الفن وبعد كده واحدة واحدة إبتدت ترجع لمطرحها ، وكتير قالوا إن سبب خلافاتها مع عمرو حمزاوى إن الجواز عطلها عن مسيرتها الفنية .
ولكن بسمة فى حوارها مع الإعلامية لميس الحديدى قالت قرار الإنفصال مكنش بسبب الشغل ،ولكن بأسباب شخصية ،وإن فى ناس كتير مبتعرفش تكمل ،وقالت كمان إن الدنيا كانت قاسية معاهم ده غير قسوة الغربة .
وبخصوص الشغل قالت إنها إشتغلت فترة وهى فى أمريكا وشاركت فى المسلسل الأمريكى تيرانت ، وخدت كورس تمثيل كمان والتجربة كانت حلوة وإتبسطت فيها ، لكن علشان تعمل كارير هناك ده صعب وكمان مكنش مناسب لظروفها خاصة إن بنتها كانت لسة صغيرة .
قالت كمان فى حوارها إن رغم الإنفصال إلا إن فى علاقة محترمة بينهم وبتعتبر عمرو جزء من عيلتها حتى لو مش متجوزين، مش بس كده حتى علاقتها بأم أولاد عمرو حمزاوى اللى هى زوجته الأولى قالت كويسة جدا وإنهم عيلة واحدة
تفتكروا ليه بعد ما إستقرت فى مصر رفضت إنها تعيش بنتها فى أمريكا و قالت مش هكررها تانى ؟
الحقيقة إنها قالت إنهم إتفقوا هى وعمرو حمزاوى على إن نادية بنتهم تقضى سنة دراسية معاه فى أمريكا وكانت بتروح تزورها خلال السنة دى وكان عندها وقتها 8 سنين .
ولكن تراجعت بعد تجرتها وقالت مش هتكررها تانى وقالت كنت متخيلة إني هبقى جامدة وقوية والسنة دي هركز فيها في شغلي وأرجع علاقاتي الاجتماعية،لكن كانت سنة صعبة عليها كأم وانها فقدت جزء كبير من إستمتاعها فى ممارسة التفاصيل الصغيرة فى حياة بنتها .
ياترى هترجع للفن ولشغلها زى ما عودت جمهورها خاصة إنها هتشارك فى مسلسل حضرة العمدة فى رمضان مع الفنانة روبى .
